DataLife Engine / Хьатыгъужъыкъуае имафэ хагъэунэфыкIыгъ.

Хьатыгъужъыкъуае имафэ хагъэунэфыкIыгъ.

Хьатыгъужъыкъуае имафэ хагъэунэфыкIыгъ. «Адыгеим искусствэхэмкIэ имастерхэр къуаджэм пае» зыфиIорэ Iофтахьабзэр ыпэкIэ игугъу зэрэтшIыгъагъэу Адыгэ Республикэр зэрагъэпсыгъэр илъэс 20 зэрэхъурэм фэгъахьыгъэу рекIокIы. Чанэу ащ хэлажьэхэрэм зэу ащыщ Къэралыгъо академическэ къэшIокIо купэу «Нальмэсыр». Iоныгъом и 10-м ансамблэ цIэрыIорэр къуаджэу Хьатыгъужъыкъауе ихьэкIагъ. Мы мафэм къоджэдэсхэм ячылэ загъэпсыгъэр илъэс 150-рэ зэрэхъугъэр хагъэунэфыкIыщтыгъэ. «Налмэсыр» сыхьатырэ ныкъорэ мэфэкIым къекIолIагъэхэм къафэшъуагъ. «Ислъамый», «Абхъаз къашъу», «Удж-хъурай» ыкIи нэмыкI къашъохэм Iэгу тео мэкъэшхокIэ къапэгъокIыщтыгъэх. Артистхэми къоджэдэсхэм ягушIуагъо зэрадагощырэр къахэщэу къашъохэр къашIыщтыгъэ. Нэужым мэфэкI зэхахьэр лъагъэкIотагъ Дзыбэ Мыхьамэт, Элдарэ Айдэмыр, Нэчэс Анжелика, ЛIыбзыу Аслъан, Мышъэ Андзаур. Мыщ фэдэ артист цIэрыIохэр зыхэлэжьагъэхэ пчыхьэзэхахьэр Хъатыгъужъыкъуае дэсхэм тын лъапIэ афэхъугъ.
КъэIогъэн фаер мэфэкI дахэм изэхэщэн кIэщакIо фэхъугъэр Хъатыгъужъыкъуае къыщыхъугъэу, орэдыIо цIэрыIоу Дзыбэ Мыхьамэт. КIэлэ ныбжьыкIэм игухэлъ Шэуджэн районым ипащэхэм дырагъэшти мэфэкIыр зэхащагъ. Къуаджэм имафэ гъэшIэгъонэу агъэпсыгъ. Шыгъачъэм, концертым, джэгум цIыфхэр ашIогъэшIэгъонэу еплъыгъэх. МэфэкIыр илъэс къэс хагъэунэфыкIынэу агу хэлъ. Мыщ фэдэ мэфэкIыхэр нэмыкI къуаджэхэми щызэхащэнхэу тэгугъэ.

ИА НатПресс
Фаина Афашагова
13-09-2011, 12:13
Вернуться назад