Чъэпыогъум и 5-м Адыгэ Республикэм ыныбжь илъэс 20 хъугъэ. Адыгеим и къэлэ ыкIи район пстэуми мэфэкIым фэгъахьыгъэ Iоф тхьабзэхэр уахътэ заулэ шIагъэу рекIокIых.МэфэкIым ипэгъокIэу, чъэпыогъум и 4-м, Къэралыгъо филармонием мэфэкI зэхахьэ щыкIуагъ. Ащ хэлэжьагъэх Адыгэ Республикэм и ЛIышъхьэу ТхьакIущынэ Аслъан, Адыгеим и апэрэ Президентэу Джарымэ Аслъан, Темыр Кавказым ыкIи Къыблэ Федеральнэ шъолъырхэм ялIыкIохэр, нэмыкIхэри. Адыгеим щыпсэухэрэм къафэгушIуагъэх Урысыем и Президентэу Д.Медведевыр, УФ-м и Къэралыгъо Думэ и Пащэу В.Матвиенкэр, Къыблэ Федеральнэ шъолырымкIэ УФ-м и Президент илIыкIоу В.Устиновыр. Ахэмэ я телеграммэхэм зэфэсым къыщяджагъэх. Нэужым Адыгеим иартист цIэрыIохэр зыхэлэжьэгъэхэ концертыр къызэрэугъоигъэхэм къафагъэлъэгъуагъ.
Пчыхьэм Мыекъуапэ игупчэ Адыгеим и эстраднэ артистхэу Нэчэс Анжелика, ЛIыбзыу Аслъан, Эльдарэ Айдамыр, нэмыкIхэми концерт къыщатыгъ.
Чъэпыогъум и 5-м пчэдыжьым щегъэжьагъэу Адыгеим мэфэкIыр хагъэунэфыкIынэу щырагъэжьагъ. Лениным ыцIэ зыхьырэ гупчэм район зэфэшъхьафхэм къарыкIыгъэ орэдыIо ыкIи къэшъокIо купхэм якъэгъэлъэгъон щырекIокIыгъ. Мыекъуапэ ипподромым мэфэкIым фэгъахьыгъэ шыгъачъэ щыкIуагъ.
МэфэкI Iофтхьабзэхэм хэлэжьагъэх Къэралыгъо филармонием итворческэ купхэр: симфоническэ оркестрэр, оркестрэхэу «Русская удаль» ыкIи «Отрада» зыфиIохэрэр, орэдыIо купэу «Ошъутен», орэдыIохэу Нэгъой Маринэрэ Андзэрыкъо Чеславрэ. Джащ фэдэу Адыгеим щыпсэухэрэм къафэгушIуагъ Кубанскэ казачий хорыр, Къэралыгъо академическэ къэшъокIо купэу «Нальмэсыр». Лениным ыцIэ зыхьырэ гупчэм къыщызэрэугъоигъэхэм мэфэкIымкIэ къафэгушIуагъ Адыгеим и ЛIышъхьэу ТхьакIущынэ Аслъан.
Адыгеим щыпсэухэрэм мэфэкI шIухьафтын лъапIэу афэхъугъ Урысые эстрадэм ижъуагъохэу Дмитрий Маликовым, Сосо Павлиашвили, орэдыIо купэу «Инь-Ян» зыфиоIорэм яконцерт. МэфэкIым кIэух дахэ фэхъугъ жъуагъотопыр.