ЗыкIыныгъэм ыкIи зэкъошыныгъэм и фестивалэу «Мир Кавказу» зыфиIорэр я пшIыкIуплIэнэрэу мыгъэ къалэу Астрахань щыкIуагъ. Хабзэ зэрэхъугъэу тиреспубликэ илъыкIохэри ащ хэлэжьагъэх. АР-м культурэмкIэ и министрэ игуадзэу ШъэуапцIэкъо Аминэт зипащэ купым хэтыгъэх Къэралыгъо орэдыIо ыкIи къэшъокIо купэу «Ислъамыер», сурэттехыхэр, АР-м лъэпкъ культурэм игупчэ иIофышIэхэр. Адыгеим щыпсэурэ IэпэIасэхэм яIэшIагъэхэр зыхэт къэгъэлъэгъоныр фестивалым къекIолIагъэхэм ашIогъэшIэгъоныгъ. Нэбгырэ 15-мэ ашIыгъэ пIуаблэхэр, адыгэ шъуашэхэр, Iэмэ-псымэ зэфэшъхьафхэр экспозицием хэтыгъэх. Анахьэу зэкIэмэ агу рихьыгъэр дышъэ идагъэр ары. КультурэмкIэ ыкIи искусствэмкIэ и координационнэ совет изэхэсыгъоу щыIагъэм культурэм щылэжьэщтхэм ягъэхьазырын фэгъахьыгъэ Iофхэм щытегущыIагъэх.
Пчыхьэм творческэ коллективхэу фестивалым къекIолIагъэхэр зыхэлэжьэгъэхэ гала-концертыр щыIагъ. Дунаим щызэлъашIэрэ купэу «Ислъамыер» ащ хэлэжьагъ. Адыгеим къикIыгъэ артистхэм Iэгу тео макъэшхокIэ къапэгъокIыгъэх.
Фаина Афашагова
ИА НатПресс