Темыр Кавказым итарихъ 1864-рэ илъэсым аухыгъэ Кавказ заор хъугъэ-шIэгъэ анахь тхьамыкIэгъошхоу зэрэхэхьагъэр илъэс къэси жъоныгъуакIэм и 21-м тыгу къэтэгъэкIыжьы.
ИлъэсипшI пчъагъэхэм къакIоцI лъыгъэчъэ заоу кIуагъэм нэбгырэ минишъэ пчъагъэ хэкIодагъ. Адыгэхэм янахьыбэ егъэ-зыгъэ IофкIэ IэкIыб къэралыгъохэм кощын фаеу хъугъагъэ. Мы хъугъэ-шIагъэхэм лIэужхэм агухэм мыкIыжьыщт тыркъохэр къатыранагъэх.
БлэкIыгъахэм тэ тыхэIэзыхьажьын тлъэкIыщтэп, ау ащ десэ къыхэтхын фае. Ахэм зэу ащыщ мамырныгъэмрэ зэгурыIоны-гъэмрэ нахь лъапIэ зэрэщымыIэр къыдгурыIоныр. ЦIыф лъэпкъыбэ зыщыпсэурэ, диныбэ зыщалэжьырэ тирегион изыпкъитыныгъэ фэлэжьэрэ лъэныкъо пстэури къыдэтлъытэзэ, тыфэсакъызэ сыд фэдэрэ унашъуи тштэн фае.
ЗэкIэ дунаим щыпсэурэ адыгэхэм лъэпкъым ыбзэ, икультурэ, ихэбзэзэхэтыкIэхэр къэгъэнэжьыгъэнхэмкIэ ягугъапIэ зэрапхырэр Урысые Федерацием хэхьэрэ Адыгэ Республикэр ары, ащ фэдэ пшъэрылъэу тиIэр зэрифэшъуашэу дгъэцэкIэн фае.
Кавказ заом хэкIодагъэхэр тыгу къэдгъэкIыжьыхэзэ, рес-публикэм тапэкIэ къырыкIощтым тегупшысэн фае. ТичIыгу гупсэ нахь кIэракIэ хъуным, тисабыйхэр ыкIи ахэм къакIэхъухьащтхэр насыпышIонхэм апае лъэпкъхэм азыфагу илъ зэфыщытыкIэшIухэр нэкум фэдэу къэтыухъумэн фае.
ТичIыпIэгъу лъапIэхэр, шъуиджэныкъо машIо егъашIи орэмыкIуасэ, шъуигупсэхэм яшIулъэгъу шъущэрэмыкI, зэдытиунэм сыдигъуи щыIэкIэшIурэ мамырныгъэрэ ерэлъ!
Адыгэ Республикэм и Президентэу
ТХЬАКIУЩЫНЭ Аслъан
Адыгэ Республикэм и Къэралыгъо Совет — Хасэм и Тхьаматэу ХЬАДЖЭБЫЕКЪО Руслъан
Тарихъыр тщыгъупшэщтэп, мамырэу тыпсэущт
Республикэ общественнэ движениеу Адыгэ Хасэм урыс-кавказ заор заухыгъэ мафэр илъэс къэс хегъэунэфыкIы. Лъыгъэчъэ заоу тичIыгу илъэси 100-м нахьыбэрэ щыкIуагъэр тарихъым егъашIи хэкIокIэщтэп.
Лъэпкъ гъэкIод заоу пачъыхьэм къытишIылIэгъагъэм къыпкъырыкIэу адыгэхэр итэкъухьагъэхэу хэгъэгу 50-м къехъумэ ащэпсэухэрэми ячIыгу, бзэр, культурэр къагъэнэжьыгъ. Непэ адыгэхэр мамырэу щыIэх, лъэпкъэу къыддэпсэурэмэ зэфыщытыкIэшIухэр адытиIэх.
Адыгэ Республикэм икъэралыгъо гъэпсыкIэ дгъэпытэным, къыткIэ-хъухьэрэ лIэужхэм тарихъыр куоу ашIэным, зэкъошныгъэр агъэлъапIэзэ янеущрэ мафэ нахьышIу хъуным фэшI урыс-кавказ заом инэкIубгъохэр тщыгъупшэхэ хъущтэп.
ЖъоныгъуакIэм и 21-м Мыекъуапэ щыкIощт зэхахьэм республикэм иIэшъхьэтетхэм, лъэпкъэу къыддэпсэухэрэм ягъусэу Адыгэ Хасэр хэлэжьэщт.
Адыгэ Хасэм игъэцэкIэкIо куп
Адыгэ Макъ