КъумпIыл Мурат инвестиционнэ зэзэгъыныгъэм кIэтхагъ КъумпIыл Мурат инвестиционнэ зэзэгъыныгъэм кIэтхагъ

Урысые агропромышленнэ къэгъэлъэгъонэу «Дышъэ бжыхь-2019» зыфиIорэм къыдыхэлъытагъэу Адыгэ Республикэм и ЛIышъхьэу КъумпIыл Муратрэ «Агрохолдинг Мирный» зыфиIорэм игенеральнэ директорэу Елена Гангалэрэ тыгъуасэ инвестиционнэ зэзэгъыныгъэм зэдыкIэтхагъэх.

Пчэн минитIу фэдиз зыщаIыгъыщт фермэ, литрэ мини 5-м нэс переработкэ зышIыщт завод цIыкIу, нэмыкI псэолъэ заулэ зыхэхьащт кластер гъэпсыгъэнэу ащ къыщыдэлъытагъ.

Пчэныщэм икъэхьыжьынкIэ Европэм опытэу щыряIэр къыдалъытэзэ, проектыр къагъэхьазырыгъ, IэкIыб къэралыгъохэм яэкспертхэмрэ ветеринархэмрэ ар ауплъэкIугъ. Пчэныщэм икъэхьыжьынрэ переработкэ шIыгъэнымрэ афэгъэзэгъэщт агропредприятие иным игъэ­псынкIэ Адыгеим ар къыщызфагъэфе­дэщт.

Проектым ипхырыщын пае Мыекъопэ районымкIэ поселкэу Трехречнэм дэжь щыIэ чIыгу гектар 600 фэдиз инвесторым къыфыхагъэкIыгъ. Инженер коммуникациехэм, щэ фермэм, административнэ унэхэм ягъэпсын фежьагъэх. Завод цIыкIуи мыщ щашIынэу рахъухьэ.

Пчэныщэм хэшIыкIыгъэ продукцие шъхьаIэхэр, адыгэ къуаери ахэм зэрахэтэу, предприятием къыщыдагъэкIыщтых. Заанненскэ пчэн лъэпкъхэм афэдэ мин 1,5-рэ къаIэкIагъэхьанэу зэзэгъыныгъэ адашIыгъах. ШэкIогъум апэрэ купыр къафащэщт. Илъэсыр имыкIызэ проектыр пхыращынэу рахъухьэ. ПстэумкIи сомэ миллион 605-м ехъурэ инвестициехэр къыхалъхьащтых.

Адыгеим и ЛIышъхьэу КъумпIыл Мурат къызэриIуагъэмкIэ, мы проектыр мэ­къу-мэщым хэхъоныгъэ егъэшIыгъэным, былымхъуным изегъэушъомбгъун, адыгэ къуаер нахьыбэу къэхьыжьыгъэным афэIорышIэщт. Пчэныщэр нахьыбэу къахьыжь зыхъукIэ гъэсэныгъэ языгъэгъотхэрэ кIэлэцIыкIу учреждениехэм ар аIэкIэгъэхьэгъэным иIофыгъуи хэплъэщтых.

«Джыдэдэм тихэгъэгу пчэныщэм нахь къыщыкIэупчIэхэ хъугъэ. Ащ хэшIыкIыгъэ гъомылапхъэхэм азыныкъо нахьыбэр IэкIыб къэралыгъохэм къаращы. ТищыкIагъэм фэдиз пчэныщэр тэ къэтхьыжьынэу джыдэдэм амал тиIэп. Мэхьанэшхо зиIэ инвестиционнэ проектышхор тэркIэ федэу щыт. Республикэм имэкъумэщ отраслакIэ щызэхэщэгъэ­ным, щэм икъэхьы­жьын­кIэ кластер гъэ­псыгъэным ар афэIорышIэщт», — къы­хигъэ­щыгъ КъумпIыл Мурат.

Адыгеим и ЛIышъхьэ проектым мэхьанэшхо зэриIэр хигъэунэфы­кIыгъ. Адыгэ Респуб­ликэм экономикэ политикэмкIэ и Координационнэ Совет проектым Iофтхьабзэхэу епхыгъэ­хэр зы чIыпIэм щызэшIохыгъэнхэм ехьы­лIэгъэ унашъор тапэкIэ ща­штагъ. Анахьэу анаIэ зытырагъэтыщтхэм ар ахалъытагъ. Административнэ Iофыгъо заулэхэм язэшIохынкIэ хабзэм икъулыкъухэр инвесторым IэпыIэгъу фэхъущтых. Ащ нэмыкIэу компаниеу «Агрохолдинг Мирный» зыфиIорэм инвестиционнэ зэзэгъыныгъэм къызэрэщыдэлъытагъэм диштэу инвестиционнэ IофшIэным кIэзыгъэгушIущтхэ амалхэр къызфигъэфедэн ылъэкIыщт.

Адыгэ Республикэм и ЛIышъхьэ ипресс-къулыкъу