05.03.2010 – 14:55 – Натпресс "Адыгэ УпчIэр (ГумэкIыгъор)" ыцIэу Иорданием тхылъ къызщыдагъэкIыгъэр тхьэмэфитIу хъугъэ. Ар зиIофшIагъэр мы хэгъэгум щыпсэурэ адыгэ тхакIоу, Иорданием итхакIохэм ясоюз хэтэу Азыкъо Мухьамэд. Тхылъым икъыдэгъэкIын хэлэжьагъ Иорданием ит Адыгэ Хасэр. Тхылъым илъэтегъэуцоу Адыгэ Хасэм иунэ щашIыгъэм хэлэжьагъэх принцэу Асим Бин Наифрэ принцессэу Сана Асимрэ, тхакIохэр, хасэм хэтхэр ыкIи нэмыкIхэр. "Мы тхылъэр стхынэу пшъэрылъ стелъэу слъытэщтыгъэ тятэжъхэу хэкум пае зыпсэ зыгъэтIылъыгъэхэм ацIэкIэ. Тхылъыр непэрэ дунаим къыдиштэу научнэу гъэпсыгъэ". - къэгъэлъэгъоным къыщиIуагъ Азыкъо Мухьамэд. Общественнэ IофышIэу Исмаил Бандура тхылъыр дэгъоу зэрэтхыгъэр къыIуагъ, шIэныгъэ лъапсэ зэриIэр ыкIи адыгэ тарихъым куоу зэрэхаплъэрэр къыхигъэщыгъ. Къэралыгъоу зыщыпсэухэрэм адыгэхэр ахэзагъэх нахь мышIэми, ялъэпкъ къаухъумэным зэрэдэлажьэхэр тхылъым къегъэлъагъо. Инженерэу, общественнэ IофышIэу Джэлыкъо Камал къэгъэлъэгъоным къыщиIуагъ: "Мы аужьырэ илъэсхэм адыгэхэр нахь къызэрэущыхэрэм, ялъэпкъ Iофхэм нахь афэщагъэу зэрэхъухэрэм мы тхылъым икъыдэгъэкIын къеушыхьаты. Адыгэ гумэкIыгъохэр зэрэщыIэхэр, зэрымыкIосагъэхэр, Урыс-Кавказ заом епхыгъэ Iофыгъохэр нахь гъэнэфагъэу тхылъым къегъэлъагъох." Тхылъыр лъэпкъым инеущырэ мафи къызэрэтегущыIэрэр Джэлыкъом къыхигъэщыгъ. КъэIогъэн фае, Азыкъо Мухьамэд I988-рэ илъэсым тхылъэу "Ос шIуцIэ", I998-рэ илъэсым тхылъэу "КIымафэм гъатхэр къегъэхъу" зыфиIохэрэр ыкIи нэмыкIхэри къыдигъэкIыгъэх. |