21.05.2010 – 10:05 - Натпресс
Жъоныгъуак1эм (маим) и 20-м Израиль ит къалэу Хьайфэ Урысые Федерацием иконсул иунэу дэтым дэжь нэбгрэ 50 фэдиз хъухэу адыгэмэ митинг щаш1ыгъ. Ащ хэтыгъэх адыгэ къуаджэхэу Кфар-Камэрэ Рихьаниерэ ащыщхэр - нахьыжъхэри, ныбжьык1эхэри. Митингыр сыхьатыр 14-м щегъэжьагъэу 16-м нэс к1уагъэ.
Ащ хэлэжьагъэхэм ащыщэу Оркъыжъ Адам Натпрессым къызэрэри1уагъэмк1э, митингыр дахэу рек1ок1ыгъ. Иегъэжьэгъум консулым иунэ ч1эс лэжьак1охэр къыч1эк1ыгъэх, ау къек1ол1агъэхэм ахэр гущы1эгъу аш1ынхэу, митингыр зык1аш1ыгъэр къизы1отык1ырэ тхыгъэхэр аратынхэу игъо имыфэхэзэ псынк1эу ч1эхьажьыгъэх.
Къэзэрэугъоигъэхэм адыгэ быракъхэр ык1и плакатхэр а1ыгъыгъэх, ахэм атетхэгъагъ 1офэу зык1эдэухэрэр: геноцидыр зэрыщы1агъэр аштэныр ык1и Шъачэ (Сочи) олимпиадэу щык1ощтыр зэпыгъэугъэныр.
Израиль адыгэу нэбгырэ мини 4-м нахьыбэ щэпсэу. Ахэр къоджит1умэ ащэпсэух - Кфар-Камэрэ Рихьаниерэ. Адыгэ унэгъо заули Израиль ит къэлэ зэфэшъхьэфхэм адэсых - Хьайфа, Тель-Авив, Эйлат, Иерусалим, Цфат ык1и нэмык1хэм.