08.06.2010 - 20:50 - Натпресс
Мы аужьырэ уахътэм Къэбэртэе-Бэлъкъар республикэм нахь къыщыбырсырэу ыублагъ, мафэ къэс пIоми хъунэу зэпэуцужьыныгъэ горэ къыщэхъу. Ахэм бэ атегущыIэхэрэр республикэми, Урысыеми ащыщхэр. Мы пстэумэ ухаплъэмэ дэгъуи, дэи ахэт. ГущыIэм фэшI, щыIэкIэ-псэукIэр зэрэдэим, е идеологие гъэнэфагъэ зэрэщымыIэм, е коррупциер зэрэиным апае радикалхэр нахьыбэ хъухэу аIо.
Зы купмэ мы Iофыр кIуачIэкIэ зэшIохыгъэн фаеу алъытэ, адырэмэ нэмыкIхэр къаIо, ау, къызэрэсшIошIырэмкIэ, Iофым ылъапсэ къыхэзгъэщыщтмэ зи атегущыIахэрэп пIоми хъущт. Сэ сишIошIкIэ, КъБР-м зэпэуцужьыныгъэхэр нахь щыгъэмэкIэгъэнхэм зэфэшъхьаф лъэпкъ хасэхэм яшIуагъэ лъэшэу къагъэкIон алъэкIыщт. Мыхэр ары анахьэу Iофыр зэшIозыхын зылъэкIыщтыр пIоми ухэукъощтэп.
Ар къызхэкIырэр Кавказым ис лъэпкъхэм лIэшIэгъу пчъагъэхэм лъэпкъ хасэхэм мэхьанэ ин аратыщтыгъ. Аущтэуи ар джыри пидзэжьыгъагъ, ау мы аужырэ илъэси I0-м лъэпкъ хасэхэм ялъэкI лъэшэу къеIыхыгъ. Ащ ушъхьагъэу иIэр бэ, ау анахь шъхьаIэу къыхэбгъэщын плъэкIыщтыр федеральнэ икIи республикэ хабзэхэр лъэпкъ хасэхэм кIуачIэ ямыIэным зэрэдэлажьэхэрэр ары. Сэ сишIошъкIэ, ар хэукъоныгъ, ау бгъэтэрэзыжьын плъэкIыщт, хабзэм нэмыкI екIолIакIэ хэсэмэ афишIымэ, шъхьафитыныгъэ аритыжьымэ.
Лъэпкъ хасэхэм къахэзгъэщынэу сызыфаер КъБР-м и "Адыгэ Хасэу" ХьашIуцIэ Мухьамэд зитхьэматыр ары. Ар сыубынэу арэп, лъэпкъым шIуагъэ къыфихьыным, республикэм фэлэжьэным лъэкIэу иIэр арихьылIэнэу зэрэхьазырым сицыхьэ телъ. Ау щыIэныгъэр ежь игъогукIэ лъэкIуатэ ыкIи бэрэ къыхэкIы о бгъэнэфагъэхэм анэмкIэу зэкIэри рекIокIэу.
Илъэси I0-кIэ узэкIэIэбэжьмэ узэрэлажьэщтыгъэр дэгъугъэми, нэмыкI екIолIакIэхэр щыIэ хъугъэх, дунаери псынкIэу зэхъокIы. Непэрэ ныбжьыкIэхэм нэмыкI гупшысакIэ яI, ахэр къаIонхэмкIэ амалхэр игъэкIотыгъэу агъэфедэх (интернетыр). Ахэм уахаплъэмэ, "Адыгэ Хасэр" ахэм апэчыжьэдэдэ хъугъэ.
НыбжьыкIэхэр "Адыгэ Хасэм" пэблагъэ пшIынхэм пае, ежь Хасэм зэхъокIыныгъэхэр фэмышIыхэ хъущтэп. Ахэр ХьашIуцIэм къыгурыIон фае, ар емыкIоп ыкIи "адыгэгъэ" шапхъэм блэкIырэп. "Непэ нэс "Адыгэ Хасэм" зирипэщагъ, ар икъущт, неущ зезыщэщтым гъогур есэты", - зиIокIэ, лIыгъэ зэрихьагъэу лъэпкъым ыцIэ къыхэнэщт.
Мы Iофым КъБР-м ипрезиденти хэлэжьэн фае. ТилIышхьэ сыд емыIолIагъэми, чэщи мафи республикэр нахь дэгъу хъуным дэлажьэ. ЫгъэцэкIагъэхэр е ымыгъэцэкIагъэхэр зэхэфыгъэнхэу арэп, уеплъымэ ар республикэм ис цIыфхэм ящыIакIэ лъэшэу зэрафэгумэкIырэр къэошIэ. Ащ пае типрезидент есIонэу сыфай: республикэм бырсырэу къыщыхъухэрэм язэпыгъэункIэ "Адыгэ Хасэр" лъэшэу IэпыIэгъу къыпфэхъун ылъэкIыщт. Ащ пае "Адыгэ Хасэр" шъхьафитэу щытын фае, ащкIэ уишIуагъэ къэбгъэкIон плъэкIыщт.
НыбжьыкIэхэр Хасэм пэблагъэ хъунхэм пае непэрэ щыIакIэм дезыгъаштэрэ, зэлъашIэрэ, Iушыгъэ зыхэлъ цIыф ащ итхьэматэу щытын фае. Непэ ащ фэдэ шапхъэхэм адиштэу слъытэрэр Хьатэжьыкъо Валер: шIэныгъэ куухэр иIэх, зэфэшъхьэф лъэныкъо пстэуми ахэлэжьэн ылъэкIыщт, цIыфхэм адэгущыIэ зэпыт, лъэпкъ зэхэдз иIэп ыкIи ныбжьыкIэхэм цыхьэ къыфашIы. Мы Iофым ехьылIагъэу ащ зи есIуагъэу щытэп, ежьыри Адыгэ Хасэм тхьэматэ фэхъунэу зэрэфэмыещтыр сэшIэ. Ау Валерэ мы тхыгъэмкIэ есэIо: непэ республикэр чIыпIэ къин ит, ори, адырэ цIыфэу щыпсэухэрэм афэдэу, пшъэрылъ уиI ар нахь дэгъу шIыгъэнымкIэ. Адыгэ Хасэм итхьэматэу узыхъукIэ ар нахь дэгъоу къыбдэхъущт.
Шэуджэн Тембулат, Налщыкъ