14.08.2010 – 19:30 - Натпресс
АР-м и Президентэу ТхьакIущынэ Аслъан Адыгеим ыкIи Пшызэ шъолъыр ащыпсэурэ быслъымэнхэм ямуфтиеу Емыж Нурбыйрэ Мыекъуапэ ыкIи Адыгеим яархиепископэу Тихонрэ Адыгэ Хасэм ипащэу Хьэпэе Арамбыйрэ тыгъуасэ ригъэблэгъагъэх. ЗэIукIэгъум хэлэжьагъэх АР-м и Премьер-министрэу КъумпIыл Мурат, ащ игуадзэу Алексей Петрусенкэр, АР-м и Президент ыкIи министрэхэм я Кабинет я Администрацие ипащэу Владислав Федоровыр, нэмыкIхэр.
Чыристан диным итамыгъэу къащхэр Адыгеим ичIыпIэ зэфэшъхьафхэм зэращагъэуцухэрэм иIофыгъо ахэр тегущыIагъэх. Къащхэм яIоф мызэу-мытIоу къаIэтыгъэ нахь мышIэми, япчъагъэ къызэрэхахъорэм цIыфхэм гумэкIыгъо къызэрахилъхьэрэр АР-м и Президент къыIуагъ, джыри агъэуцунхэр къызыхэкIыгъэм фэгъэ¬хьыгъэ упчIэр архиепископым къыфигъэзагъ. Чыристан диным дэлажьэхэрэм япащэ къызэриIорэмкIэ, ащ чылысыр хэхьагъэп, зыпарэми фитыныгъэ аритынэу тхылъ къыфагъэхьыгъэп. Ащ фэдэ чIыпIэ агъэуцуным ежь кIэмытхэщтэу ары къызэриIорэр, зэмызэгъыныгъэ къахэзылъхьан гухэлъ зиIэхэм яIэшIагъэу ылъытагъ. НэмыкIэу къэгущыIагъэхэми ащ иеплъыкIэ дырагъэштагъ.
- Тыхэмыукъоным пае законым тетэу мы Iофыр зэхэтфын фае, - къыIуагъ республикэм ипащэ. - Бырсыр зэпэуцужь къыхэкIы хъущтэп, арэп зыуж титыр, тызэрэрыгущыIагъэр икъущт, шIагъэ горэ щыIэн фае.
Алексей Петрусенкэр мы Iофыр зэхифынэу фигъэзагъ, зэшIуахырэм охътэ благъэм тыщигъэгъозэнэу фигъэпытагъ.
Джащ фэдэу быслъымэнхэмрэ урымхэмрэ якъэхалъэхэр Мыекъуапэ зэрэщагъэпсыщтхэми тегущыIагъэх. Адыгеим ыкIи Пшызэ шъолъыр ащыпсэурэ быслъымэнхэм ямуфтиеу Емыж Нурбый илъэIукIэ чIыгу гектар 50 къэлэ администрацием къыгъэнэфагъ. Ащ щыщ гектари 10-р урымхэм афагъэзэнышъ, къэхалъэхэр зэпыутыгъэхэу, ядэхьапIэхэр шъхьафэу ашIынхэу рахъухьагъ. Ащ епхыгъэ Iофхэм язэхэфын амалэу щыIэмкIэ къыгъэпсынкIэнэу ТхьакIущынэ Аслъан къалэм ипащэ фигъэпытагъ.
ХЪУТ Нэфсэт
Адыгэ Макъ