01.09.2010 – 13:35 – Натпресс
Лъытэныгъэ ЗыфэтшIэу Аслъанчэрый!
Адыгэ Хэкум, ичIыгужъ къинэжьыныр зинасып къыхьыгъэ Адыгэ мэкIэ тIэкIур ары лъапсэ фэхъугъэр. Шышъхьэмыгъазэу, къызэкIакIо имыIэу, теубытагъэ хэлъэу фэбэнэгъэ хэкурысыр ары Адыгэ Республикэр къыдэзыхыгъэр. Ори, Республикэм икъыдэхыгъо лъэхъэнэ мыпсынкIэм, лъэпкъым кIэхэкIыгъэм, непэ узырипэщэ уилъэпкъэгъухэм агу ихъыкIыгъэм ущымыгъуазэу щытэп.
ЕтIани хэти фэдэу Ори ущыгъуаз, Адыгэ быракъыр зыщыбыбэтэрэ Адыгэ Республикэр, щыпсэухэрэм ямызакъоу,хэкурыси, хэхэси хэгъэгу зэфэшъхьафыбэмэ арытэкъухьэгъэ адыгэхэм ягугъапI, Адыгэ Республикэм и Президенти ежьыхэмэ я Президентэу алъытэ, Адыгэ хэгъэгуми рэгушхох. Президенты цIэр уимыIэжьыми хъунэу зэрэплъытагъэм лъэпкъыр зэрэпсаоу зэридзагъ.
Арышь, хэгъэгу адыгэ хасэм ихэсашъхьэ, шышъхьэIум и 23-рэм иIэгъэ, къоджэ хасэхэм ялIыкIохэри, лъэпкъ гумэкI зиIэхэри зыхэлэжьэгъэ игъэкIотыгъэ зимычэзыу зэхэсыгъо;
Адыгэ Республикэм и Президент, президентыцIэр иIэу къэнэжьын фаеу ылъытагъ. А ц1эр щызгъэзыен фит закъор, ар къыдэзыхыгъэ адыгэ лъэпкъыр арэу зэрэщытым, а шъуашэр зы нэбгырэкIэ къемыжьагъэу зы нэбгырэм дэбгъэкIодыжь зэрэмыхъущтыр кIигъэтхъыгъ.
УиеплъыкIэ Къэралыгъо хасэм хэмылъхьэмэ нахь тэрэзэу ыштагъ. Хэгъэгу адыгэ хасэм къэралыгъо хасэм зыфигъэзэнэу, ащ къыкIэльыкIоу джыри зэфэмышIыгъэ лъэпкъ зэфэсым иIофшIэн ригъэжьэжьыным дэлэжьэнэу рихъухьагъ.
ТапэкIэ Адыгэ Республикэм и Президент, къамыгъэнафэу, УФ и конституцие амыукъоу Республикэм щыпсэухэрэм нахьыпэм зэрэхадзыщтагъэм къыфагъэзэжьыныр нахь тэрэзэу, ПрезидентыцIэр уиIэу укъэнэжьынэр лъэпкъымкIи, Урысые ФедерациемкIи нахь шъуашэу зэдырагъэштагъ.
Лъэпкъым ишIоигъоныгъэ къызэрэдебгъэштэщтым тыщыгугъэу зыкъыпфэтэгъазэ.
Адыгэ Хасэм итхьэматэу Хьэпэе Арамбый