13.10.2010 – 22:30 – Натпресс
Адыгэ Республикэм и Президентэу ТхьакIущынэ Аслъан Германием къикIыгъэ инвестор купым мы мафэхэм IофшIэгъу зэIукIэгъу дыриIагъ. Инновационнэ проектхэм инвестициехэр ахэлъхьэгъэнхэм, унэе предпринимательствэм зегъэушъомбгъугъэным, социальнэ сферэм, туризмэм, гъэсэныгъэм, медицинэм, псэолъэшIыным хэхъоныгъэхэр ягъэшIыгъэнхэм Iоф адэзышIэрэ нэмыц инвесторхэм Адыгеим ылъэныкъокIэ къагъэхьазырыгъэ предложениехэм Президентыр ащагъэгъозагъ.
IэкIыб къэралым къикIыгъэ хьакIэхэм шIуфэс гущыIэхэмкIэ пэублэм ТхьакIущынэ Аслъан закъыфигъэзагъ, АР-м иэкономикэ хэхъоныгъэу ышIыхэрэм кIэкIэу къащыуцугъ. Республикэм ипащэ къызэрэхигъэщыгъэмкIэ, мы аужырэ илъэсищым къыкIоцI Адыгеим иэкономикэ сомэ миллиард 39-рэ фэдиз инвестициеу къыхалъхьагъ. БэмышIэу Шъачэ щыкIогъэ форумым сомэ миллиард 14-м ехъу зытефэщт зэзэгъыныгъэхэм республикэр ащыкIэтхагъ. А пчъагъэхэм къагъэлъагъо непэ тиэкономикэ инвестициехэр къыхэплъхьанхэр зэрэфедэр, ащкIэ зи пэрыохъу зэрэщымыIэр.
- АР-м зэрэщырэхьатыр, лъэпкъ зэгурыIоныгъэ зэрилъыр къыдэплъытэмэ, тиэкономикэ къыхашъулъхьэрэ ахъщэр ухъумагъэ, ащ шIуагъэ къызэрэшъуфихьыщтым щэч хэлъэп, - къыIуагъ ТхьакIущынэ Аслъан. - ТиIо зэхэлъэу тызэдэлэжьэным, ныбджэгъуныгъэ тазыфагу илъэу, шъхьэихыгъэу тызэдэгущыIэным тыфэхьазыр.
Фирмэу «ББЙ» зыфиIорэм ипащэу Манфред Шнайдер къызэриIуагъэмкIэ, республикэм зэпхыныгъэу дыряIэр гъэпытэгъэнымкIэ непэрэ зэIукIэгъур ятIонэрэ лъэбэкъоу щыт. МэзитIукIэ узэкIэIэбэжьмэ, бгъуитIур зэрэзэдэлэжьэн алъэкIыщтым епхыгъэу пэшIорыгъэшъ зэзэгъыныгъэ зэдашIыгъагъ. Туризмэм хэхъоныгъэхэр егъэшIыгъэнхэм ылъэныкъокIэ зипэщэ фирмэм опытышхо зэрэIэкIэлъыр, ащкIэ Iоф зэдашIэмэ зэрашIоигъор М.Шнайдер къыхигъэщыгъ. Джащ фэдэу гъэсэныгъэм, медицинэм, псэолъэшIыным алъэныкъокIэ инвестиционнэ проектэу яIэхэм Президентыр ащигъэгъозагъ, предложение гъэнэфагъэхэри къыхьыгъэх. ЧIыгоу «Зарландвестфален» зыфиIорэмрэ Адыгеимрэ зэкъош хъунхэм фэгъэхьыгъэ официальнэ тхыгъэу АР-м и Президент факIорэр республикэм ипащэ къыритыгъ.
Инвесторхэм къагъэхьазырыгъэ проектхэм бгъуитIуми шIуагъэ къафихьын зэрилъэкIыщтыр ТхьакIущынэ Аслъан зэIукIэгъум кIэух зэфэхьысыжьэу къыфишIыгъ ыкIи ащкIэ республикэм къытефэрэр зэкIэри зэригъэцэкIэщтыр къыIуагъ.