«Адыгэ Хасэм» ия XV-рэ зэфэс фэгъэхьыгъэ зэхахьэм АР-м и Премьер-министрэу КъумпIыл Мурат хэлэжьагъ

Республикэ общественнэ движениеу «Адыгэ Хасэм» ия XV-рэ зэфэс тыгъэгъазэм и 12-м Къэралыгъо филармонием щыкIощт. Ащ фэгъэхьыгъэ зэхахьэу Адыгэ Хасэм и Совет иIагъэм АР-м и Премьер-министрэу КъумпIыл Муратэ, Парламентымрэ Правительствэмрэ ахэтхэр, тиреспубликэ къырыкIощтымрэ лъэпкъ Iофыгъохэмрэ агъэгумэкIыхэрэр хэлэжьагъэх.

Общественнэ движениеу «Адыгэ Хасэм» и Совет итхьаматэу Хьэпэе Арамбый зэфэсыр филармонием зэрэщызэхащэщтым, докладэу ащ къыщишIыщтым анахьэу щыхигъэунэ­фыкIы шIоигъохэм зэIукIэм хэлажьэхэрэр ащигъэгъозагъэх.

Хьэпэе Арамбый къызэриIуа­гъэу, Адыгэ Хасэр лъэпкъ шIэжь тиIэу тыпсэуным, тылэжьэным пылъ. ЛIэшIэгъу зэфэшъхьафхэм адыгэ чIыгур къэзыухъумагъэхэм, лIыхъужъныгъэ зезыхьагъэхэм саугъэт афэгъэуцугъэным бэшIагъэу тегущыIэх. Iофыр хэпшIыкIэу лъыкIуатэу фежьагъ. Ти Президентэу ТхьакIущынэ Аслъан, Парламентымрэ Правительствэмрэ ащ епхыгъэ зэхэщэн Iофхэр агъэцакIэх. Саугъэтыр зыщагъэуцущт чIыпIэр къыхахыгъ - филармонием дэжь. Архитектор цIэрыIоу Бырсыр Абдулахь ышIыгъэ проектыр хэбзэ шапхъэмэ адиштэу къыхахыгъ. Апэрэ чэзыум ахъщэу саугъэтым игъэпсын пэIуагъэхьащтыр къызыдырахыщтыри къагъотыгъ.

Адыгабзэм изэгъэшIэн, игъэфедэн

Адыгэ Хасэр а Iофыгъом бэрэ тегущыIэ. ГумэкIэу ащкIэ ти­Iэхэм къакIичыгъэу Хьэпэе Арамбый къыIуагъэп. КIэлэ­цIыкIу IыгъыпIэхэм, еджапIэхэм адыгабзэр зэращызэрагъашIэрэм Адыгэ Хасэр лъэплъэ. ЩыкIагъэу къыхагъэщыгъэхэр Правительствэм икъулыкъушIэхэм алъагъэIэсыгъэх.

Мыекъуапэ Адыгэ Республикэм икъэлэ шъхьаI. Ар къыдэплъытэзэ зэфэхьысыжьхэр зып­шIыхэкIэ нафэ мэхъу: адыгабзэри къэралыгъуабзэу щытми, икъоу щагъэфедэрэп. Мыекъуапэ дэ­хьэпIитф иIэу къэтэлъытэ. Гум къео республикэм икъэлэ шъхьаIэ къэралыгъуабзэу аштагъэхэр икъоу зэрэщамыгъэлажьэхэрэр. Мыекъуапэ идэхьапIэхэм ащыщ къалэм ыцIэ адыгабзэкIэ тетхагъэп. Республикэм ыкIи къалэм ямэфэкIхэм адыгабзэкIэ тхыгъэ шIуфэс гущыIэхэр макIэу ащытэлъэгъух.

Тэри тыхэлэжьэщт

Саугъэтэу зыцIэ къетIуагъэм ишIын зыфежьэхэкIэ, Адыгэ Хасэр Iофым ыбгъукIэ щытыщтэп, иамал къызэрихьэу хэлэжьэщт. Тикъалэхэмрэ къуаджэхэмрэ ацIэхэр ядэхьапIэхэм адыгабзэкIи, урысыбзэкIи атетхэгъэнхэм, тиныдэлъфыбзэ игъэфедэн, нэмыкI лъэпкъ Iофыгъохэм чанэу ахэлэжьэщт.

ЕплъыкIэхэр, зэфэхьысыжьхэр

Хьэпэе Арамбый дырагъаштэзэ зэIукIэм къыщыгущыIагъэх Бэгъушъэ Адамэ, Абыдэ Хьисэ, Едыдж Мэмэт, Къэлэшъэо Аскэрбый, КIэрмыт Мухьдинэ, Хъунэго Чэтибэ, нэмыкIхэри. Автомобиль гъогухэм цIыфыбэ зэра­текIуадэрэм, машинэ зэутэкIхэм тхьамыкIагъоу къытфахьырэм, цIыфхэм ягумэкI-гупшысэхэм нахьышIоу ащыгъэ­гъозэгъэ­нымкIэ куп зэхэщэгъэным, ти­лъэпкъэгъухэу IэкIыб хэгъэгумэ къарыкIыжьыхэрэм IэпыIэгъу ятыгъэным, титарихъ нахьышIоу зэгъэшIэгъэным фэшI археологмэ ягумэкIхэм нахь игъэкIотыгъэу адэлэжьэгъэным, физкультурэмрэ спортымрэ зягъэушъомбгъугъэным, 2014-рэ илъэсым Олимпиадэ джэгунхэу Шъачэ щыкIощтхэм Адыгеир зэрахэлэжьэщтым, нэмыкI Iофыгъохэу зэфэсым къыщаIэтыщтхэм атегущыIагъэх.

Зэхахьэм республикэ телевидением ипащэу Бэгъушъэ Азэмат, республикэ гъэзетхэу «Советскэ Адыгеимрэ» «Адыгэ ма­къэмрэ» яредактор шъхьаIэхэу Валерий Кондратенкэмрэ Дэрбэ Тимуррэ хэлэжьагъэх. Премьер-министрэу КъумпIыл Муратэ зэIукIэм къекIолIагъэхэр зытегущыIэрэ Iофыгъохэм зэрагъэгумэкIыхэрэр къыдилъытэзэ, республикэм икъэралыгъо къулыкъушIэхэмрэ общественнэ движениеу «Адыгэ Хасэмрэ» зэрэзэдэлажьэхэ шIоигъом къытегущыIагъ.

Адыгэ быракъым имызакъоу, адыгэ шъуашэм имэфэкI зэхэщэгъэныр КъумпIыл Муратэ игъоу ылъытагъ, адыгэ шъуашэр щыгъэу ежьыри а мафэм Iофы­шIэ къэкIощтэу къыIуагъ. Республикэ гъэзетхэм, телевидениемрэ радиомрэ Адыгэ Хасэм иIофыгъохэр цIыфмэ нахьышIоу алъагъэIэсын зэрэфаем, зэфэсыр дэгъоу зэрэзэхащэщтым, нэ­мыкIхэми атегущыIагъэх.

Адыгэ Макъ