Щылэ мазэм и I5-м 20II-рэ илъэсым, Туркуем икъалэ шъхьэIэ дэт "Анкара и Адыгэ Хасэ" иныбжьыкIэ комитет кIэщакIо зыфэхъугъэ семинар зэхащэгъагъ. Ар зыфэгъэхьыгъагъэр "Черкесская Идентичность" зыфэпIощтыр ары. Семинарым игъэкIотыгъэу къыщыгущыIагъ ыкIи зэрищагъ Анкарэ дэт университетым экономикэмкIэ ифакультет идеканэу, профессэрэу Севда Алакущ. Хасэм хэтхэр ыкIи хьакIэхэр ащ къыщыгущыIагъэх ыкIи упчIэхэр къатыгъэх. ТапэкIэ мыщ фэдэ семинархэр зэхащэзэ зэрашIыщтыр ныбжьыкIэ комитетым хэтхэм къаIуагъ.
БлэкIыгъэ мазэм интернет- сайтэу Сherkessia.net ыкIи общественнэ организациеу Сircassian-network.com ягухэлъкIэ Германием ит къалэу Кельн конференцие щызэхащэгъагъ. Ар адыгэ Iофыгъохэм афэгъэхьыгъагъ, конференциер интернет технологиекIэхэм атетэу кIуагъэ, зэнкIэ зэпхыныгъэмкIэ хэгъэгу зэфэшъхьафхэм арыс адыгэхэр зэхэгущыIэжьыгъэх, конференцием хэлэжьагъэх. Адыгэ Хэкум щыщэу ащ хэлэжьагъэх Адыгэ Хасэм итхьэматэу Хьэпае Арамбый , Черкес Конгресым итхьэматэу Бэрзэдж Мурат, Интернет- сайтэу Черкесия. нет ипащэхэм ащыщэу Хъуадэ Аднан.
Иорданием ис адыгэ ныбжьыкIэ купым IофшIэным фэгъэхьыгъэу адыгэхэр IэпыIэгъу зэфэхъуным пае сайт къызэIуахыгъ http://adigajobs.com, ар арапыбзэкIэ тхыгъэ. Иорданием ис адыгэхэу IофшIапIэхэр зимыIэхэм, IофшIэн лъыхъухэрэм, санэхьэт зиIэхэм сайтым якъэбар къырагъэуцон алъэкIыщт.
США-м ит къалэу Нью-Джерси дэт Адыгэ Хасэм бэмышIэу хэдзынхэу щыкIуагъэхэм щыхадзыгъэ ныбжьыкIэ комитет иапэрэ Iофтхьабзэ зэхищагъ. Ар зыфэгъэхьыгъагъэр осым лыжэхэмкIэ щыкIонхэм фэдэ шIоигъоныгъэ зиIэхэр фэгъэсэгъэнхэр ары. Ащ пае щылэ мазэм и 22-м комитетым иныбжьыкIэ куп ыугъоихи, Iуашъхьэм ыщэгъагъэх, мы спорт лъэпкъыр зэзгъашIэ зышIоигъохэр агъэсагъэх.