Адыгэ Хасэм и Тхьэматэу
Хьэпэе Юсыф ыкъо Арамбый факIо
ЗигъашIэ кIахьы хъун Тхьэмат!
"ШIэжьымрэ зыкIыныгъэмрэ" зыфиIорэ саугъэтэу Адыгэ Хасэр икIэщакIоу агъэуцурэм екIолIэкIэу ори Хэсашъхьэми фышъуиIэм дезымыгъаштэрэр непэ макIэп. Сэри ахэмэ сащыщ. Саугъэтым лъэкъоцIэ гъэнэфагъэхэр тептхэныр, зыхэр адрэхэмэ ашъхьарыбгъэкIоныр лъэпкъым ыпашъхьэкIэ хэукъоныгъэшхоу, тилIэужымэ къягоожьынэу, зэпыщыт къытхазылъхьащт Iофыгъоу тэлъытэ.
Саугъэтым игъэуцун тэ зэрэтлъэгъурэм фэгъэхьыгъэу республикэм щыпсэухэрэмэ яконституционнэ фитныгъэхэмэ ягарантэу щытыр Президентыр арыти, мы IофымкIэ ащ зыфэдгъэзагъ (шъхьаихыгъэу фэттхыгъэм икопие къыпфэтэгъэхьы). Тэ мы Iофым тызэреплъырэр Президентымрэ Адыгэ Хэсашъхьэм хэтыхэмрэ къызэрэшъуфэдгъэхьыгъэм имызакъоу тиамал къызэрихьыкIэ лъэпкъыми етхьылIэщт, гъэзетыхэми Интернетыми къарыдгъэхьащт, фаем нэIуасэ зыфишIын ылъэкIынэу. Ори, Хэсашъхьэм хэтыхэми кIасэ шъумыхъузэ мы Iофым къыфэжъугъэзэжьыным игъу.
Узэрэщыгъуазэу сэ сшъхьэкIэ сишIошI адыгэ организациехэмэ я Советэу зэхэтщагъэми къыфэзгъэхьыгъ, бэмышIэ Черкескъалэ щыкIогъэ зэIукIэм шъущыхэплъагъ, ау тигупшысэ къышъупкъырыхьагъэу слъэгъурэп. Саугъэтым иIоф лъэпкъ Iоф, лъэпкъ IофымкIэ хэтырэ адыги пшъэдэкIыжь ехьы. Ары ори Хэсашъхьэми шъухэукъо зыкIытшIомыигъор. Саугъэтым иIоф Адыгэ Хасэми Унэ фыжьыми язакъоу унашъо зытырашIыхьан Iофэп, зэрэлъэпкъэу Хасэм зэрэхэмытым фэдэу зэрэлъэпкъэуи Унэ фыжьым чIэсэп.
Зэ паIор жъугъэIыстыжьи шъуеупчIыжь.
ШIуфэс къышъозыхыжьырэр
АРОД "Самгъур" и Тхьэматэу Къуекъо Асфар
© elot.ru