Шъыгъо-Ш1эжь мафэр Адыгеим икъалэ шъхьэ1эу Мыекъуапэ щыхаугъэнэфык1ыгъ

Жъоныгъак1эм и 21-м Адыгэ Республикэм икъалэ шъхьэ1эу Мыекъуапэ Урыс-Адыгэ заор заухыгъэр илъэси 147 зэрэхъугъэм фэгъэхьыгъэ Ш1ыгъо-Ш1эжь мафэр щызэхащагъ.

Сыхьатэр 16.00 Мыекъопэ къэлэ паркым нэбгырэ 500 фэдиз къыщызэрэугъоигъ ык1и ахэмэ адыгэ быракъхэр, плакатхэр а1ыгъхэу къежьэхи урамэу Краснооктябрьскэм къырык1охи къэралыгъо филармонием къэсыгъэх. Ащ игупчэ купыр зэхэтэу зы сыхьатрэ щытыгъ.

Сыхьатэр 18.00 Ш1ыгъо-Ш1эжь мафэр Адыгэ Республикэм ифилармоние изал щырагъэжьэнэу щытыгъ ык1и пчэгум щызэхэтхэм Адыгэ Хасэм хэтхэм залым ч1эхьанхэу къары1уагъ. Купэм хэт ныбжьык1эхэм ащыщхэм амакъэ къа1этыгъ, залым шъуч1эмыхь а1уи ык1и упч1э къагъэуцугъ: «сыда мы зэхахьэр филармоние ч1эхьэгъум, пчэгум щамыш1ырэ».

Адыгэ Хасэм хэтхэр ныбжьык1эхэм къахахьэхи адэгущы1агъэх ык1и такъикъ 15-рэ тэк1у зэнэкъокъугъэх, ет1анэ зэгуры1охи филармонием къек1ол1агъэ пстэури залым ч1эхьагъэх.

Адыгеим ипремьер-министрэу Къумп1ыл Мурат Урыс-Адыгэ заом къинэу Адыгэхэм къафихьыгъэр тыгу къэдгъэк1ыжьын зэрэфаер къы1уагъ ык1и ащ фэдэ къытэмыхъул1эжьнэу непэрэ мафэмрэ неущырэ мафэмрэ тягупшысэн ык1и тадэлэжьэн зэрэфаер къыхигъэщыгъ.

Адыгэ Хасэм итхьэматэу Хьэпэе Арамбый Урыс-Адыгэ заом къытегущы1агъ ык1и къы1уагъ генералэу Урыс-Адыгэ заом хэлэжьагъэхэм, лъэпкъ гъэк1одыр зыгъэцэк1агъэхэм ясаугъэтхэр зэрагъэуцухэрэр зэрэмытэрэзыр. Генералэу Романовым исаугъэт Адыгэ Республикэм и Мыекъопэ район зыми емыупч1ыжьхэу зэрэщагъэуцугъэр ащ хигъэунэфык1ыгъ.

Мы зэхахьэм мы нэбгырит1ур ары къыщыгущы1агъэр, нэужьым гухэк1 орэдхэр, гъыбзэхэр къа1уагъэх.
Зэхахьэм ык1эм Нэгъэплъэ Аскэрбый ифильмэу «Черкесиер.Хымэ хэгъэгу» зыфи1орэр къагъэлъэгъуагъ.

Къэ1огъэн фае, мы илъэсым Ш1ыгъо-Ш1эжь мафэр Адыгэу дунаим тет пстэуми анахь игъэк1отыгъэу зэрахагъэунэфык1ыгъэр. Адыгэхэр зыщыпсэурэ ч1ып1э пстэуми нэбгырэ мин пчъагъэхэр зыхэлэжьэгъэхэ зэхахьэхэр, митингхэр ащык1уагъэх.