ЖъоныгъуакIэм и 26-м ичэщ КъумпIыл Мурат зимычэзыу зэIукIэу зэхищагъэр псыкъиуным епхыгъэу республикэм игъэцэкIэкIо хабзэ иорганхэр зэрэзекIощтхэм фэгъэхьыгъагъ.
- Псыхъохэр къызэриугъэхэм тхьамыкIагъоу къыздахьыгъэхэм ядэгъэзыжьынкIэ зэдедгъаштэу Iоф тшIэн фае. Псым зэрар зэрихыгъэхэм ящыкIэгъэ IэпыIэгъур ягъэгъотыгъэнымкIэ амалэу щыIэр зэкIэ зэдгъэуIун фае, - къыIуагъ республикэм и Премьер-министрэ.
Тыгъоспчэдыжь ехъулIэу Адыгеим ирайонищмэ - Джэджэ, Кощхьэблэ, Шэуджэн районхэм, ипсэупIи 7-мэ - станицэу Дондуковскэм, къутырхэу Краснэм, Чехрак, къуаджэхэу Хьакурынэхьаблэ, Джыракъые, поселкэу Игнатьевскэм, Хьатыгъужъыкъое къоджэ псэупIэм джыри псыр зэрадэтыгъ. Унэгъо 558-мэ ящагухэм псыр адэтыгъ, псым сэман унэ 12 ыгъэфыкъогъагъ.
ЗэIукIэм ыуж КъумпIыл Мурат Шэуджэн районым кIуагъэ. Псыхъоу Фарзэ къызэриугъэм, чIыпIэ-чIыпIэу дамбэр зэращыIуитхъыгъэм къыхэкIэу тыгъоснахьыпэ мыщ Iофхэр къыщыхьылъэгъагъэх. Псыр унэгъо 230-мэ къакIэогъагъ, нэбгырэ 903-мэ зэрар аригъэхьыгъагъ. Iофыр етIани къэзгъэхьылъэщтыгъэр къуаджэхэу Къэбыхьаблэрэ Пщычэурэ электроэнергиер зэраIэкIэмыхьэщтыгъэр ары, чIыпIэ-чIыпIэу къуаджэхэу Хьакурынэхьаблэрэ Джыракъыерэ электролиниехэр ащызэпыутыгъагъэх.
Тыгъоспчэдыжь ехъулIэу Сергиевскэ къоджэ псэупIэм - къутырэу Тамбовскэм, станицэхэу Сергиевскэмрэ Екатерининскэмрэ псыр ащызэкIэкIожьыгъ, цIыфхэм яунэхэм къагъэзэжьэу рагъэжьагъ. Станицэу Джаджэ щыпсэурэ унэгъо 96-мэ ящагухэм джыри псыр адэт, унэхэм псыр зэрарыкIыжьыгъэм ыкIи электроэнергиер къатэу зэрэрагъэжьэжьыгъэм къахэкIэу цIыфхэм яунэхэм къагъэзэжьы. Джэджэ районыр зэрэщытэу пштэмэ, псыкъиуным унэгъо 96-мэ зэрар арихыгъ.
Кощхьэблэ районымкIэ псэупIэхэу «Красный» зыфиIорэм щы-
псэурэ унэгъо 70-мэ, Чехрак дэс унэгъуи 8-мэ ящагухэм джыри псыр зэрадэт. Ащ нэмыкIэу псым къутырэу Игнатьевскэм дэс унэгъо 250-мэ зэрар аригъэкIыгъ. Мыхэм псыр сантиметри 10 - 20-кIэ къащыдэкIоегъагъ, ау цIыфхэр зыщыпсэурэ чIыпIэхэм арагъэкощыкIыгъагъэхэп.
Адыгэ Республикэм мэкъу-мэщымкIэ и Министерствэ къызэ-
ритыгъэмкIэ, пэшIорыгъэшъэу къызэралъытагъэмкIэ гектар 3250-мэ къарахыжьын фэегъэ лэжьыгъэр чIанагъ. Кощхьэблэ районымкIэ чIэнагъэр зэрэхъурэр гектар мини 3, Мыекъопэ районымкIэ гектар
237-рэ (ащ щыщэу гектар 88-р бжыхьасэхэм, 140-р тыгъэгъазэм, гектари 4-р садхэм ыкIи 5-р цумпэхэм зэлъаубытыщтыгъ), Джэджэ районым чIэнагъэу ышIыгъэр гектари 5 (ахэм ащыщэу гектаритIумэ картофелыр, 3-мэ хэтэрыкIхэр ащашIэгъагъэх).
Джэджэ, Кощхьэблэ районхэм япсыхъохэм нахь къащыкIичэу рагъэжьагъ. Ау псыхъохэу Фарзэрэ Щэхъураджэрэ агъэфыкъогъэ гъогухэр зыпкъ игъэуцожьыгъэнхэмкIэ псыдэчъыпIэхэм, урамхэм ягъэкъэбзэнкIэ, IофшIэнхэр джыри лъагъэкIотэщтых. Псым зэрар зэрихыгъэ унагъохэр къакIухьэхэзэ, чIэнагъэу ашIыгъэр агъэунэфы.
Псыхъохэр къызэриугъэхэм епхыгъэу Урысые Федерацием пенсиехэмкIэ и Фонд Адыгэ РеспубликэмкIэ и Къутамэ Комиссие зэхищагъ, Iоф зымышIэрэ пенсионерхэу псым зэрар зэрихыгъэхэм IэпыIэгъу ягъэгъотыгъэным епхыгъэ Iофыгъохэм ар ахэплъэщт.
Адыгэ Республикэм
и ЛIышъхьэ ипресс-къулыкъу
Адыгэ Макъ