Мэкъуогъум и 3-м Адыгэ Интернет Порталэу elot.ru иадминистрациерэ порталым ныбжьыкIэу хэлажьэхэмрэ Шам ис Адыгэхэм яхьылIагъэу джэпсалъэ къатыгъ. Ар зыфэгъэзагъэр Урысые Зэгохьаныгъэм ипрезидентэу Димитри Медведевыр, Дунае Адыгэ Хасэм итхьэматэу Аджахъо Къаншъаубый, Адыгэ ик1и Къэбэртэе-Бэлъкъар Республикэхэм япащэхэу Къанэкъо Арсенрэ Тхьэкущынэ Асланрэ, Темерзов Рэщыд ыкIи Адыгэ организациеу щыIэ пстэухэм.
Джэпсалъэм къыщаIо ахэр Шам къыщыхъухэрэм лъэшэу зэрагъэгумэкIыхэрэр ыкIи ащ цIыфыбэ зэрэхэкIуадэрэр къыхагъэщы. Шам заор нахь лъэшы зэрэщыхъущтым ыкIи ащ Адыгэхэр зэрэхэкIодэн зэрилъэкIыщтым къыкIагъэтхъы.
Джэпсалъэм икIэухым Адыгэхэр хэкум къащэжьынхэу пащэхэм зафагъазэ.
Мыекъуапэ щылажьэрэ Хэкум къэзгъэзэжьыхэрэм IэпыIэгъоу афэхъурэ организациеу «ДАР» зыфиIорэм итхьэматэу Сташъу Андар Натпрессым къызэрэриIуагъэмкIэ, мафэ къэс Шам ис Адыгэхэм телефонкIэ адэгущыIэ яIофхэр зытетыр зэригъэшIэным пае. «Сирием бырсырэу къыщыхъухэрэм непэ нэс джыри Адыгэ ахэкIодагъэп, ау мы Iофым уигъэгумэкIынэу щыт», - еIо СтIашъум.
КъэIогъэн фае, Шам нэбгырэ мини I80-рэ фэдиз Адыгэу исэу къатхы, ахэр къоджэ 20 фэдизмэ ащэпсэух, къалэхэу Дамаск, Алепо, Хьумс Адыгэ мин пчъагъэхэр ащэпсэух, нэмык1 къалэу Сирием итхэм Адыгэ нэбгыри шъэ пчъагъэхэри адэсых.