Iоныгъом и 1-м ШIэныгъэм и Мафэм станицэу Джаджэм дэт еджапIэу № 1 Адыгэ Республикэм и ЛIышъхьэу ТхьакIущынэ Аслъан ихьэкIагъ. ЛIышъхьэм, ащ игъусагъэхэм къапэгъокIыгъэх район ыкIи къуаджэ администрацием иIофышIэхэр, кIэлэегъаджэхэр. Адыгэ республикэм и ЛIышъхьэ и пресс-къулыкъ къызэритырэмкIэ, еджэгъу илъэсыр зэраублагъэмкIэ кIэлэегъаджэхэм, кIэлэеджакIохэм ыкIи ахэмэ ятэ-янэхэм ТхьакIущынэ Аслъан афэгушIуагъ. Ащ зэрэхигъэунэфыкIыгъэмкIэ, аужырэ илъэсхэм гъэсэныгъэм Адыгеим сомэ миллион 600-м къехъу щыхалъхьагъ. Мы илъэсым, кIэлэегъаджэхэм ялэжьапкIэ процент 30 хэгъэхъогъэным фэшI, сомэ миллион 65 атIупщыщт. Нахь игъэкIотыгъэу ТхьакIущынэ Аслъан мыгъэ апэрэу еджапIэм чIэхьагъэхэм афэгушIуагъ ыкIи псауныгъэ пытэ яIэу, еджэным гъэхъэгъэшIухэр щашIынэу афиIуагъ.
- Илъсибл хъугъэ ти республикэ хабзэу дэгъу иIэ зэрэхъугъэр: Iоныгъом и 1 апэрэ классым чIэхьагъэхэм ящыкIэгъэщт Iэмэ-псымэхэр зыдэлъ портфелхэр аратынэу. Мыгъэ тэ ахэмэ къахэдгъэхъуагъ шIузэреджэщт тхылъхэри. Арышъ, пшъэрылъ шъхьаIэу шъуиIэр дэгъоу шъуеджэныр ары.- къариIуагъ кIэлэеджакIо цIыкIухэм ТхьакIущынэ Аслъан.
ЕджапIэми Адыгэ Республикэм и ЛIышъхьэ шIухьафтын дэгъу фишIыгъ. Сомэ мин 200 зэрылъ сертификатыр аритыгъ. ЕджэпIэм гъэцэкIэжьын Iофхэр зэрашIыщтым тефэщт ахъщэр къаритынэу ыкIи 1 «б» классым игъэкIотыгъэу зэрэдеIэщтымкIэ кIэлэегъаджэхэмрэ кIэлэеджакIохэмрэ ТхьакIущынэ Аслъан къыгъэгугъагъэх.