МэфэкIхэу адыгэмэ хагъэунэфыкIыхэрэм джыри зы къахэхъощт. Республикэ общественнэ движениеу «Адыгэ Хасэр» кIэщакIо фэхъуи, Iоныгъом и 28-р адыгэ шъуашэм имафэу агъэнэфагъ. Апэрэ мэфэкIым изэхэщэн хэлажьэх къокIыпIэм щыпсэурэ лъэпкъхэм якъэралыгъо музееу Мыекъуапэ дэтым иIофышIэхэр, шIэныгъэлэжьхэр, сурэтышIэхэр, артистхэр.
МэфэкIым изэхэщэн дэлажьэхэрэм пшъэрылъ шъхьафэу зыфагъэуцурэр адыгэ шъуашэм идэхагъэ, уасэу дунаим щыриIэр, непэ шъаушэр тищыIэныгъэ зэрэщагъэфедэрэр къэгъэлъэгъоныр ары. Илъэс къэс мы мэфэкI зэхащэнэу агу хэлъ.
Мы мэфэкIыр Адыгэ Республикэр илъэс 20 зэрэхъурэм фэгъахьыгъэу зэхащэ. Илъэпкъ итарихь зышIогъэшIэгъонхэр, адыгэ культурэм уасэ фэзышIэу зыгъэлъапIэрэ пстэури зэхэщакIохэм къырагъэблагъэх. ЗэIукIэр зыщыкIощтыр къокIыпIэм щыпсэурэ лъэпкъхэм якъэралыгъо музееу Мыекъуапэ дэтым Iоныгъом и 28-м. Сыхьатыр 18-00-м рагъэжьэщт.