Къолъхьэ тын-Iыхыныр Адыгеим имызакъоу, зэрэ Урысыеу анахь гумэкIыгъо Iофхэм ащыщ. Къэралыгъо къулыкъумкIэ ыкIи кадрэ политикэмкIэ ГъэорышIапIэм, Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие регион щынэгъончъагъэм иIофыгъохэмкIэ икъутамэ Адыгеим и ЛIышъхьэу ТхьакIущынэ Аслъан иунашъокIэ семинар зэхащагъ. АР-м и ЛIышъхьэ и пресс-къулыкъу къызэритырэмкIэ, ащ иIофшIэн хэлэжьагъэх къэралыгъо хабзэм и иреспубликэ органхэм япащэхэр, Адыгэ Республикэм и Прокуратурэ, апшъэрэ еджапIэхэм ыкIи ведомствэ гъэнэфагъэхэм ялIыкIохэр.
Зэхэсыгъом хэлажьагъэхэм ягущыIэхэр зыфэгъэхьыгъагъэр къолъхьэ тын-Iыхыным пэшIуекIогъэнымкIэ, къэралыгъо граждан къулыкъумкIэ зигъо Iофыгъохэр, къэралыгъо къулыкъушIэхэр яIофшIапIэ зэрэщызекIон фаехэм афэгъэзагъэ комиссиехэм яIофшIэн шIуагъэ къытэу зэхэщэгъэныр ары.
Джащ фэдэу, зытегущыIэгъэ Iофыгъохэм ащыщ, Адыгэ Республикэм икъэралыгъо органхэм зэдырагъаштэу къолъхьэ тын-Iыхыным пэшIуекIонхэ зэрэфаем. КъэгущыIагъэхэм къыхагъэщыгъ Адыгеим икъэралыгъо хабзэ иорганхэм къолъхьэ тын-Iыхыным пэшIуекIогъэным тегъэпсыхьэгъэ планхэр зэрагъэхьазырыгъэхэр ыкIи джырэ уахътэм ахэр зэрагъэцакIэрэр.