Адыгэхэм сыдигъокIи къин зиIэм дэIэпыIэхэу яхабз. Непэ къызынэсыгъэми лъэпкъ хабзэм и шапхъэхэр укъуагъэ хъухэрэп. Джащ къыхэкIэу, Германием щыпсэурэ тилъэпкъэгъухэм Адыгеим псыкъиуным къыфигъэ къиныгъохэм афэгъахьыгъэ къэбарыр къызанэсым бэрэ емыгупшысэхэу IэпыIэгъу зэрэфэхъун амал къагъотыгъ. Ахъщэ сомэ мин 250-рэ къаугъои Адыгеим имэфэкI хэлэжьэнэу Германием къикIыгъэ купым къырагъэхьыгъ. Ахъщэр къуаджэу Пщычэу дэт кIэлэцIыкIу ыгъыпIэм игъэцэкIэжьын пэIуагъэхьанэу зэдаштагъ. Сабый нэбгырэ 80-р зыдакIорэ ыгъыпIэм псыкъиуным зэрарэу къыфигъэм фэшI илэжьэн зэпигъэугъ.
УнэкIоцIым игъэтэрэзыжьын пэIухьащт ахъщэр АР-м культурэмкIэ и министрэу Чэмышъо Гъазый, Шэуджэн районым и администрацие ипащэу Хъуажъ Налбый, ащ игуадзэу Мэрэтыкъо Аслъан, къуаджэ администрацием ипащэу Къэрэбэт Къэплъан сабый ыгъыпIэм ипащэу Дэгужъые Мариет ратыжьыгъ. Мэрэтыкъо Аслъан къызэриIуагъэмкIэ, унашъхьэм игъэцэкIэжьын ыкIи шъхьангъупчъэхэм язэблэхъун тефэщт мылкъур республикэм и бюджэт къафитупщыгъ.
Германием щыпсэурэ тилъэпкъэгъэу СтIашъу Исхъан къызэриуагъэмкIэ, IэкIыб къэралыгъохэм ащыпсэурэ адыгэхэр Адыгеим щыпсэухэрэм агукIи апсэкIи апэблагъэх. Мыщ щыхъурэ пстэури ашIогъэшIэгъон. ЗыгорэкIэ яшIуагъэ Адыгеим къырагъэкIын алъэкIымэ ягуапэ мэхъу.
Сабый ыгъыпIэм ипащэ IэпыIэгъу къязгъэкIыгъэ пстэуми зэрафэразэр игущыIэ къыщихигъэщыгъ. ИлъэсыкIэм ехъулIэу гъэцэкIэжьын Iофхэр аухыщтых.
Фаина Афашагова
ИА НатПресс