Наркоманием узэгъусэу уебэнын фае

Наркоманиер тинепэрэ щыIакIэ ианахь гумэкIыгъо шъхьаIэхэм ащыщ. ЩыIэныгъэм къыздихьырэ кътныгъохэр зыщагъэгъупшэ ашIоигъоу наркотикхэр зыгъэфедэхэр макIэп. Ащ фэдэ шъхьэгъэпцIэным хэбзэнчъэ зекIуакIэр, псауныгъэ зэщыкъуагъэр къыздехьы. Наркоманием пэшIуекIогъэным, наркотикхэр хэбзэнчъэу зыгъэфедэхэрэм, кIэлэцIыкIухэр а Iофым хэзыщэхэрэм ябэныгъэным фэгъахьыгъэ Iофыгъохэм Адыгеим иIэшъхьэтетхэр зэпыугъо имыIэу дэлажьэх.
Наркотикхэр хэбзэнчъу гъэфедэгъэным пэшIуекIогъэнымкIэ Адыгэ Республикэм щызэхэщагъэ комиссиеу Адыгеим и ЛIышъхьэу ТхьакIущынэ Аслъан зипащэм тыгъуасэ зичэзыу зэхэсыгъо иIагъ. Ащ хэлэжьагъэх АР-м и Къэралыгъо Совет-Хасэм и Тхьэматэу Ф.Федорко, АР-м и Премьер-министрэ игуадзэу А.Петрусенкэр, минстрэхэм я Кабинет хэтхэр, нэмыкIхэри.
Зэхэсыгъом хэлэжьагъэхэм къызэраIуагъэмкIэ, мы гумэкIыгъом изэшIохын фэгъэхьыгъэ Iофтхьабзэхэр лъэныкъо зэфэшъхьафхэмкIэ зэшIуахых.
Непэ шIуагъэ къэзытырэ екIолIыкIэу къыхагъэщыгъэхэм ащыщ зихэхъогъухэр спортым пыщагъэ зэрэхъухэрэр. АР-м физкультурэмрэ спортымрэкIэ и Комитет ипащэ игуадзэу Джарымэкъо Юсыф къызэриIуагъэмкIэ, гъэсэгъуаекIэ алъытэрэ сабый нэбгырэ 240-рэ спортым пыщагъэ еджапIэхэм зыщагъасэх, ахэмэ ащыщэу нэбгыри 100-р гъэсэгъуаекIэ алъытэрэ сабыйхэм алъыплъэрэ комиссием исписок хагъэкIыжьыгъэх. АР-м хэгъэгу кIоцI IофхэмкIэ и министрэу А.Речицкэм къызэриIуагъэу, зэкIэмкIэ Адыгеим ащ фэдэ сабый 378-рэ агъэунэфыгъ.
АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъоь Аскэр игущыIэ къыщыхигъэщыгъ, телевидениемрэ гъэзетхэмрэ наркотикхэр хэбзэнчъэу зэрагъэзекIохэрэм ыкIи зэрагъэфедэхэрэм фэгъахьыгъэ материалхэр къызэратырэр, ахэмэ япчъагъэ зэрэхагъэхъощтыр.
Джащ фэдэу мы Iофым еплъыкIэу фыряIэхэр къырIотыкIыгъэх АР-м ныбжьыкIэ IофхэмкIэ и Комитет ипащэу М.Къэрэтэбаным, Мыекъуапэ районым ипащэу Е.Ковалевым, Тэхъутэмыкъуае районым ипащэ игуадзэу Б.ХьэпакIэм.
Зэфэхьысыжьхэр зэхэсыгъом фишIызэ, ТхьакIущынэ Аслъан къызэрэугъоигъэхэм къафигъэпытагъ наркоманием епхыгъэ гумыкIыгъо зэрылъ унагъом пэпчъ унэсынэу, удэлэжьэнэу зэрэщытыр.

Фаина Афашагова
ИА НатПресс