Мэзаем и 11 Адыгэ Республикэм щылажьэрэ движениеу «Адыгэ Хасэ Черкес Парламент» зыфиIорэм Мыекъуапэ зэфэс щыригъэкIокIыгъ. Ащ хэлэжьгъэх Адыгеим изэфэшъхьэф шъолъырхэм къарикIыгъэ лIыкIохэр, ахэр 500 фэдиз хъущтыгъэ, мыхэм нэмыкIэу зэфэсым хьакIэ фэдэу къекIолIагъ 500 фэдиз. ТIори зэхэтэу зэфэсым 1000 фэдиз хэлэжьагъ.
КъэгущыIагъэ пстэуми къыхагъэщыгъ Сирием щыпсэурэ Адыгэхэр яхэкужъ къагъэзэжьыным пае Урысие Федерациер зэрэдэлэжьэн фаер.
«Адыгэ Хасэ Черкес Парламент» игъэцэкIакIо-куп хэтэу НэгъукI Аслъан Черкесия Таймс къызэрэриIуагъэмкIэ зэфэсым унашъо ышIыгъ хасэм игъэцэкIакIо-куп мафэ заулэкIэ джэпсалъэ (резолюцие) ыгъэхьэзырынэу ыкIи ар УФ ипащэхэм фагъэхьынэу.
КъэIогъэн фае, Сирием щыпсэурэ Адыгэхэр Адыгэ Хэкум къэщэжьыгъэнхэм пае мазэ ипэкIэ Адыгеим ипарламент, Дунае Адыгэ Хасэ ыкIи зэфэшъхьэф Адыгэ организациехэм джэпсалъэхэр УФ ипащэхэм афагъэхьыгъагъ ау непэ нэс УФ ипащэхэм мы Iофым ехьылIагъэу зи къаIуагъэп ыкIи къэбар гъэнэфагъэ щыIэп.
Сурэтхэр зытихыгъэр: ЩакIо Аслъан
Circassiatimes.com