Пащэу уиIэщтым ихэдзын Iоф къызэрыкIоп. Тиреспубликэ иобщественнэ движениеу «Адыгэ Хасэм» ихэсашъхьэ зэхэсыгъоу тхьаумафэм иIагъэм Сирием зэо-банэу щыкIорэм щытегущыIагъэх. Зэхэщэн Iофыгъохэм ащыхаплъэхи, Адыгэ Хасэм итхьаматэу Бэгъушъэ Адамэ зыкIыныгъэ ахэлъэу щыхадзыгъ.
УФ-м ФедерациемкIэ и Совет хэтхэм ягъусэхэу Адыгэ Республикэм икIыгъэ нэбгырищ Сирием щыIагъ. Ахэр - Парламентым идепутатэу КIэрмыт Мухьдин, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, республикэ Адыгэ Хасэм итхьаматэу Бэгъушъэ Адам.
Адыгэ Хасэм ихэсашъхьэ изэIукIэ Бэгъушъэ Адамэ купым хэтыгъэхэм ягугъу къышишIыгъ. Сирием къыщилъэгъугъэр зэфихьысыжьзэ, адыгэу исхэм шъхьэихыгъэу якъэбар къамыIотагъэу ылъытагъ. Ар къызыхэкIыгъэр гурыIогъуаеу А. Бэгъушъэм къыщыхъугъэп. Сирием ис тилъэпкъэгъухэр хэгъэгум иIэшъхьэтетхэм афэшъыпкъэх. Сириер нахьыпэкIэ заохэм захэлажьэм, адыгэу ахэкIодагъэр макIэп. Тилъэпкъэгъухэр лIыгъэ зезыхьагъэмэ сыдигъуи ащыщыгъэх. Джырэ уахътэ адыгэхэр Сирием къикIыжьынхэм дэгуIэхэрэп. Бырсырхэм ахэкIодэщтхэми, «щынагъэх», «къумалыгъэ къызыхагъэфагъ» зыфэпIощтхэр къараIокIынэу фаехэп.
Шъхьэлэхъо Аскэри Бэгъушъэ Адами Адыгэ Хасэм къызэрэщаIуагъэу, Сирием щыпсэурэ тилъэпкъэгъухэр зэгорэм мыщ къикIыжьынхэ фаеу чIыпIэ зэжъу зифэхэкIэ, Адыгэ Республикэр ары къыхахыщтыр.
Тхьаматэр - Бэгъушъэ Адам
Тигъэзет къыхиутыгъагъ Адыгэ Хасэм итхьаматэу аужырэ илъэсхэм Iоф зышIэгъэ Хьэпэе Арамбый иIэнатIэ зэрэIукIыжьыгъэр. Общественнэ движениеу «Адыгэ Хасэм» и Устав къызэрэдилъытэу, хэсашъхьэм изэIукIэ тхьаматэр щыхадзыгъ.
Адыгэ Хасэм итхьаматэ игуадзэу Нэгъуцу Аслъан пэублэ гущыIэ къышIыгъ, Хасэм игъэцэкIэкIо куп унашъо зэришIыгъэм щигъэгъозагъэх. Ащ къызэриIуагъэм-
кIэ, Адыгэ Хасэм итхьаматэу хадзынэу Бэгъушъэ Адамэ гъэцэкIэкIо купым зыкIыныгъэ хэлъэу къыгъэлъэгъуагъ.
Хэсашъхьэм къыщыгущыIагъэх Хъунэго Чэтибэ, Къуекъо Аслъанбый, Тыкъ Заур, Талъэкъо Адам, Ацумыжъ Юсыф, Бырсыр Батырбый, Мыгу Рэщыдэ, Абыдэ Хьисэ, ЛIыунэе Руслъан, Дзэсэжъ Заурбый, Къэбэртэе Адам, ЕхъулIэ Юрэ, Къэбэртэе Аскэрбый, Шъхьэлэхъо Аскэр, нэмыкIхэри.
Тхьаматэ хъунэу фаер арэп, IэнатIэр зезыхьан зылъэкIыщтыр ары хадзымэ ашIоигъоу къаIуагъэр.
Бэгъушъэ Адамэ имурадхэр къыIуатэхи, IофшIэным ыгукIи зэрэфэхьазырыр къызеIом ыуж, IэIэтыкIэ шIыкIэм тетэу зыкIыныгъэ ахэлъэу Адыгэ Хасэм итхьаматэу ар хадзыгъ.
Адыгэ Макъ