Илъэс 20-эу мы олимпиадэр зыщы1эмэ азыфагу Мыекъуапэ ар я 4-рэу щырек1ок1ы. Биолог ныбжьык1э анахь лъэшмэ ащыщхэу нэбгырэ 150-м фэдиз мызыгъэгурэм Адыгеим икъэлэшъхьа1э къэк1уагъ, ахэр, дунэе зэнэкъкъухэм ахэлэжьагъэхэр ахэтхэу, къэралыгъом ирегион 13-м къарык1ыгъэх. Зэрысыщтхэр къушъхьэ лъэныкъом щы1э 1эзап1эу «Кавказ», зыщызэ1ук1эщтхэр - Адыгэ къэралыгъо университет. Зэнэкъокъухэр тхьамафэм къык1оц1 к1ощтых. 

Олимпиадэм ижюри итхьаматэу Пасечник Владимир къызэри1уагъмк1э, к1элэеджак1охэу мышк1э апэрэмэ ащыщхэу зыкъэзгъэлъагъохэр дунаим ианахьэ апшъэрэ еджэп1э дэгъумэ ач1эхьанхэ алъэк1ыщтых. Ащ нэмык1эу мыхэр Дунэе олимпиадэу Австралием мыгъэ щык1ощтым хэлэжьэнхэ алъэк1ыщтых. 

Хьэк1э ныбжьык1эхэу Адыгеим къеблэгъагъэхэм АР-м ипрезидентэу Шъэумэн Хьазрэт ш1уфэс телеграммэ къафигъахьыгъ ык1и мы рек1ок1ырэ 1офыгъор аш1огъэш1эгъонынэу, ш1эныгъэмк1и, нэмык1 бгъухэмк1и федэ къафэхъунэу афэлъэ1огъ.

© 1999-2003