Шэуджэн районым ис пстэуми апае АР-м ипрезидентэу Шъэумэн Хьазрэт гъэтхэгум и-27-м зэхахьэ афиш1ыгъ. Культурэм и-Унэу зыщызэрэугъоигъэхэм ц1ыфхэр ч1эмыфэжьыхэу уахътэм ехъул1эу къек1ол1эгъагъэх. Зэхахьэм апэу къыщыгущы1агъэр районым итхьаматэу Мэрэтыкъо Руслъан. Ащ, 1офым хигъэк1ын ылъэк1ыгъэм уигъэрэзэн зэримылъэк1ыщтыр къыди1озэ, илъэсит1ум къык1оц1 ыш1агъэр к1эк1эу къы1отагъ, ежь-ежьырэу 1энат1эр къызэригъэт1ылъыжьырэри къыпигъэхъожьыгъ. Президентым ухэукъуагъэмэ ор-орэу гъэтэрэзыжь ы1уагъэп, к1ори ащ лъыпытэу ц1ыфмэ ахэт1ысхьажь зыфэп1онэу 1апэ фиш1ыгъ нахь. 

Сыхьатищэу ащ къык1элъык1уагъэм къык1оц1 ц1ыфмэ зэш1уамыхышъурэ 1офыгъохэм зэхахьэр тегущы1агъ ык1и тхьэмэтак1э аш1ын алъэк1ыщтхэм къэбарэу апылъым хэдэ1уагъ. Шъэумэным ащк1э къыхигъэщыгъэр – мы зэ1ук1эм ежь къызк1эк1уагъэр тхьэмэтак1э горэ ыгъэнэфагъахэу арэп, ц1ыфмэ лъытэныгъэ зыфаш1ырэмэ ац1эхэр къаригъэ1онэу ары нахь. Зэпстэумк1и зэдегупшысэнхэу ары. Ежь Адыгеим ил1ышъхьэ зыфэе закъоу къы1уагъэ, ц1ыфмэ агъэнафэрэм шъыпкъагъэ хэлъын фае. 

Ащ фэдэу зыц1э къа1уагъэр нэбгырэ заулэ мэхъу. Зэрэзэдаштагъэмк1э, хэдзынхэр къэмысызэ, президентыр ахэмэ зырызэу за1уигъэк1энышъ, хъунэу ыш1ош1ырэм ыц1э къы1ощт.

1офыгъо зэш1омыхыгъэхэр арымэ, мы районым сыдигъок1и ащ фэдэу илъыгъэр бэдэд. Ахэмэ зэращыгъэуазэм емылъытыгъэу, къэгущы1энэу фаеу зы1уагъэмэ зэк1эмэ Шъэумэным гущы1э аритыгъ.

Шъугу къэтэгъэк1ыжьы: анахь мыхъунэу Мэрэтыкъом зэрихьагъэмэ ащыщэу ц1ыфмэ зэлъаш1э хъугъагъэр, Иорданием къик1ыжьыгъэ адыгэмэ чэтэхъо хъызмэтш1ап1эу зэтырагъэпсыхьагъэу агъэлажьэщтыгъэр зэратырихыгъагъэр ары. Шъыпкъэ, ахъщэу хагъэк1одагъэр къаритыжьынэу 1уагъэ ыш1ыгъагъ. Ау ащ ыуж бэдэдэ темышэу а чэтэхъо хъызмэтш1эап1эр банкрот хъугъэ, тхьаматэу Мэрэтыкъом ащ фиш1ыгъагъэр хьапсым ч1агъэт1ысхьагъ. Сыдэу щытми ч1ыфэр мыпщыныжьыгъэу джы нэс къанэ. 

© 1999-2003