Мы гъэмафэм къык1оц1 ят1онэрэу Адыгеим ипрезидентэу Шъэумэн Хьазрэт республикэ телевидением икъэтынк1э бэдзэогъум и 31-м занк1эу къэгущы1агъ. Апэрэр мэкъуогъум и 19-м рагъэк1ок1ыгъагъ ык1и ц1ыфхэм къатыгъэ упч1эхэу, ау зиджэуап зэритыжьынэу игъо имыфэгъагъэхэм джы джэуапхэр аритыжьыгъэх. Къэ1огъэн фае мы упч1эхэр нахьыш1ум ылъэныкъок1э зэш1охыгъэ зэрэхъугъэхэр. Ащ къыхэк1эу, джырэ къэтын занк1эм илъэхъан зэрэфэразэхэр ц1ыфхэм бэрэ къыра1отык1ыгъ, сыд фэдэрэ егъэжьап1и гъэхъагъэ щиш1ынэу къыра1ол1агъ.

Ау нэмык1 упч1эхэри къатыгъэх. Гущы1эм пае, мы къэтыным къыхэхьагъ Хьэпэк1э Аслъан иупч1э: "1офш1эп1э ч1ып1ак1эу сыд фэдиза Адыгеим щагъэпсыгъэр пэщэ 1энат1эм узы1утым къыщыублагъэу?" Ащ мыщ фэдэ джэуап президентым къыритыжьыгъ:

"Пчъагъэхэр тэрэз дэдэу къэс1онхэу къыздэсштагъэхэп, сэш1э ащ фэдэ ч1ып1эу мини 2,5-рэ фэдиз зэрагъэпсыгъэр. Ау къэ1огъэн фае 1офш1эп1э ч1ып1эхэу зи зы1умытхэм япчъагъэ мини 4,5-рэ фэдиз зэрэхъурэр. Ащ нэмык1эу, Урысыем инэмык1 шъолъырхэм афэмыдэу Адыгеим к1элэегъаджэхэм, 1эзап1эхэм ащылажьэхэрэм, социальнэ 1офыш1эхэм ч1ыгу 1ахьэхэр ащыратыгъэх. Мы 1офыгъор зэрэзэш1уахыгъэр къыса1уагъ районхэм ык1и къалэхэм япащэхэм. Чылагъо закъохэр арэп ч1ыгу 1ахьэхэр зыщагощыгъэхэр, Мыекъуапэ ич1ып1эхэми, Адыгэкъали, чылагъоу Яблоновскэм фэдэхэми арых. Пенсием щы1э нэбгырит1у ч1ыгу гектари 7 е 8 къаратыгъэмэ, ащ акъохэр, япхъорэлъфхэр ащэрэлажьэх. Ц1ыфхэм 1оф аш1эным тызэрэфэбанэрэм ар зэу ащыщ. 1офш1эп1э ч1ып1э зимы1эхэм афэгъэхьыгъэмэ, ари зэрэщытэу 2008-2010-рэ илъэсхэм анэс зэш1охыгъэ хъущт".

Къуаджэу Пэнэжьыкъуае 1эзап1эу щаш1ырэм иш1ын нахь зэрамыгъэпсынк1эрэм республикэм ипащэ зэримыгъэразэрэр къыри1отык1ыгъ. Ащ фэгъэхьыгъэу къэупч1агъэх: "1эзап1эр унэе мылъкоу уи1эм щыщк1э зэраш1ырэм къыхэк1эу, упч1эр о пфэгъэхьыгъ: сыдигъо, о уиш1ош1к1э, ащ иш1ын аухыщт?"

"Ахъщэм икъэт1упщын къызэтеуцоу арэп, ар зы мафи къагъэуцугъэп. Ау шапхъэ горэхэр къэуцух. Нэмык1 ч1ып1эхэм псэуалъэхэр ащысш1ыхэ зэхъум ащ фэдэ шапхъэхэмк1э сыкъызэтырагъэуцощтыгъэп. Проектыр зыш1ыхэрэм нахь ахъщабэ къызэра1эк1эхьащтым елъытыгъэу я1офш1эн зэхащэ. Зэк1э ащ фэдэ ч1ып1эхэр къыхафэх, сэ мы 1энат1эр зэрэси1эзи ахэмэ сапэш1уек1он слъэк1ырэп. Гущы1эм пае, Красноярск е Магадан псэолъэ зэфэшъхьафхэр щысш1ыхэ зэхъум къулыкъу бэхэм, проректыр зыш1ыхэри ахэтхэу, ыпк1э хэмылъэу я1офш1эн агъэцак1эщтыгъ. Мыщ нэмык1 шъыпкъ 1офхэр зэрэщытхэр - пшъо тырахын фае ык1и нахьыбэу. Нэмык1эу къэп1он зыхъук1э, сэрэп ар зэлъытыгъэр".

Икъэгущы1эгъу зыщиухыным Шъэумэн Хьазрэт къэтыным еплъыхэрэм яцыхьэ тыригъэлъыгъ, ыпэрэм фэдэу, упч1эу джэуап зэритыжьынэу игъо зыфимыфагъэхэр игъэк1отыгъэу зэрэзэхафыщтхэм, амал и1эмэ нахьыш1ум ылъэныкъок1э ахэр зэрагъэцэк1эщтхэм.

© 1999-2003