 |
Мыщ фэдэ агентствэ зэхэщэгъэным имурад щы1э зыхъугъэр бэш1агъэ, т1эк1у ш1агъэу ащ фэдэ гухэлъ ти1агъ. Ич1ыгужъ имысэу, лъэпкъ итэкъухьагъэу, къэралыгъо 50-м ехъурэмэ ащыпсэухэрэм къэбархэр алъыгъэ1эсыгъэнхэм нахь шъхьа1э сыда хъурэр? Ятарихъ ч1ыналъэ щыхъурэ хъугъэ-ш1агъэхэм ахэр ащыгъозэнхэ фаеба? Мыщ щыпсэурэ ц1ыфхэм ягъусэхэу, яхэкужъ къырык1ощтым, ащ инеущрэ мафэ зыфэдэщтым адегупшысэнхэу ахэмэ фитыныгъэ я1энэу щытба? Къызэрэтш1ош1ырэмк1э, ащ фэдэ фитыныгъэ я1. Арышъ, тэ тфэмыш1ыгъагъэми, мыр т1ури зы зыгорэм ыш1ын фэягъ.
Сыда къат1омэ тш1оигъуагъэр adygnatpress зызыфэтэусым? Мыщ хэт гущы1э 1ахьэу nat зыфи1орэр ары икъу фэдизэу къыбгурымы1он ылъэк1ыщтыр. Ау ащ фэдизэу ари гуры1огъуаеп. Ар "Нарт" гущы1эм нахь ижъырэ къэ1уак1. Ащ фэдэу гущы1э жъы дэдэу зэрэщытым емылъытыгъэу, адыгэ лъэпкъхэм ащыщ джырэ тилъэхъани "наткъуаджэхэр" а1озэ заджэх. "Нартхэм якъуаджэ щыпсэухэрэр" зыфэп1ощтыр ары ащ къик1ырэр. Ащ имызакъоу, тызыгъэразэрэмэ ащыщыр – "нат" зыфи1орэр инджылыз гущы1эу "nation" игъэк1эк1ыгъэ тхык1эу "nat" зэрэтефэрэр.
Агентствэм сыд фэдэ ш1ык1эм тетэу хэхъоныгъэхэр ыш1ыщтха? Зэк1э адыгэхэр зэгуры1онхэм пае нэбгырэ пэпчъ бзэ заулэ ыш1эн фае. Мы тилъэхъан диштэрэ ш1ык1эм тыкъыпкъырык1ызэ, бзитфымэ тарылэжьэн гухэлъхэр ти1эх. Ахэр адыгабзэр, урысыбзэр, инджылызыбзэр, тыркубзэр ык1и арапыбзэр. Апэрэ бзищыр непэ къыз1эк1этэгъахьэ.
«Тэ», - зыт1ок1э, хэта зигугъу тш1ырэр? Джырэ уахътэм агентствэм нэбгырэ заулэ дэлажьэ. Ахэр, ыпэрапш1эу, агентствэм изэхэщэн ик1эщак1охэу, журналистэу, агентствэу Regnum икорреспондентэу Щэш1э Аслъанрэ (адыгабзэмрэ урысыбзэмрэ еш1эх) Израиль къик1ыжьыгъэ тилъэпкъэгъоу, Адыгеим и Лъэпкъ музей и1офыш1эу Бгъанэ Алыйрэ (адыгабзэр, арапыбзэр, инджылызыбзэр, джуртыбзэр еш1эх). Ет1анэ, сайтым игъэпсын, игъэк1эрэк1эн адэлажьэу, иухъумак1оу Къоджэшъэо
И, гъэзетэу "Адыгэ макъэм" ижурналистэу Гъук1эл1 Сусан (адыгабзэмрэ урысыбзэмрэ еш1эх), Адыгэ къэралыгъо университетым иаспирантурэ щеджэу Нещеретов Олегрэ (урысыбзэмрэ инджылызыбзэмрэ еш1эх)
Сыд фэдэ ш1ык1эм тетэу къэбархэр алъыдгъэ1эсынхэу тыгу хэлъа? Зэк1эм апэу, ти1офш1эн хэш1ык1 ин фиты1энымк1э, къэт1уатэрэм шъыпкъагъэрэ зэфагъэрэ ахэлъынымк1э пхъэшагъэ зыфыти1эу тыкъек1ол1эщт. Тэ тиш1ош1к1э, къэбархэм яджэщтхэм ары ящык1агъэри.
|
|
|
|
