 |
ЩэшIэ Аслъан
АСФАРЭ ИПШЫС
Шъэожъыер ным фэмычъыеу щылъ. Яни, зыгорэ еIулIэжьышъ, ыкъо кIэрыс.
— Уфая,— еIо ошIэ-дэмышIэу сабыим,— къыпфэсIотэщт пшысэ?
Къырегъажьэшъ, къеIуатэ урыс ныо цIыкIу горэм коц тIэкIу ышыпи, ар ыхьаджи, етIанэ тхьацур ыпши, хьалыгъу хъурэе цIыкIоу Колобок зыцIэр зэригъэжъагъэр. Шъхьангъупчъашъхьэм ыгъэучъыIынэу зытырегъэуцом, ащ зыригъэукIорэехи, мэзым зэрэхэлъэдэжьыгъэр. ХьэкIэ-къуакIэмэ ар зэраIукIагъэр, ахэмэ зэраIэкIэкIыжьыгъэр — зэкIэри дэгъоу зэригъэкIоу къыIотагъ.
Баджэуи а хьалыгъур зыдырын фаем нэси, ащи IэкIигъэфагъэп.
— Баджэми зыригъэшхыгъэп, ара, сишъау? — къеупчIыгъ янэ.
— Мэз чIэгъым укIорэйзэ щычъэгъэ хьалыгъур ушIоигъэти, фэягъэп,— риIожьыгъ Асфар.
|
|
