ЩэшIэ Аслъан

Ятэжърэ икъорылъф Щамилрэ мэзым хэтхэзэ, мэзахэ хъугъэ. Мазэм къыгъэнэфэу шъофым къихьажьыгъэх. ТIэкIурэ загъэпсэфыгъ.

 Мазэр щыт, ошъуапщэр макIо,— ыIуагъ Щамилэ.

 Хьау, адрэри мыдрэри зэфэшъхьафэу макIох,— къыгъэтэрэзыгъ ятэжъ.

— Щыт нахь ар,— Iапэ фишIыгъ сабыим.— Куамэмэ ашIонагъэмэ сшIэрэп...

Ятэжъ етIысылIи къыфиIотагъ ошъуапщэр жьыбгъэм огум зэрэщифырэ шIыкIэр, ЧIыгури Мазэри зэрэхъураехэр, Мазэм мыуцоу ЧIыгур хъурэябзэу къызэрикIухьэрэр, Тыгъэм епхыгъэхэу ахэр къызэрекIокIыхэрэр.

Щамилэ ятэжъ къыIорэм едэIугъ. Зежьэжьхэм, бэрэ мазэм лъыплъагъ. ЕтIанэ ыгъэшIагъоу къызIуипхъотыгъ:

— КъызгурыIуагъ джы, тэтэжъ,— ыIуагъ.— Мазэр тэ тыздэкIорэм къэкIо!

Ядэжь зынэсыжьыхэм, янэжъ къыфиIотагъ мэз мэзахэм мазэр къыхащыжьи, къызэращэжьыгъэр.

Ятэжъ ыIуагъэхэри ыушъэфынэу ыдагъэп. Ау сабыим игущыIэхэр къыгъэшъыпкъэжьэу, шъхьаныгъупчъэм уиплъымэ плъэгъунэу, мазэр ашъхьагъы итыгъ.

© 1999-2003