Адыгеим ыкIи Краснодар краим апхырыкIырэ автомобиль гъогоу М-4 «Дон» зыфиIорэм макъэ къэзыгъэIурэ тамыгъэ ращагъ.
Къэралыгъо компаниеу «Автодорым» ипресскъулыкъу къызэритыгъэмкIэ, автомобилыбэ зэрыкIорэ гъогум щынэгъончъагъэр щыгъэпытэгъэным мыщ ишIуагъэ къэкIощт.
— Машинэхэр зэрыкIорэ гъогунапцэм километрэ 35-рэ фэдиз зикIыхьэгъэ макъэ къэзыгъэIурэ тамыгъакIэ ращагъ. Автомобилыр ащ зытехьэкIэ, водителым макъэр зэхехы ыкIи машинэр къэсысэу регъажьэ. Зефэным ащ иягъэ къекIырэп, ары пакIошъ, гъогум щыхъурэ-щышIэрэм унаIэ нахь тырыуегъадзэ. Мы тамыгъакIэм ишIуагъэкIэ гъогу хъугъэ-шIагъэхэр нахь макIэ хъущтых. Сыда пIомэ пшъыгъэу къекIокIы-хэрэ водительхэр ащ зытехьэхэкIэ, зыкъашIэжьыщт, — къыщаIуагъ «Автодорым».
Автомобиль гъогум километрэ 1119 — 1542-м къыхиубытэрэм светодиоднэ нэфрыгъозэ 15 кIэу тырагъэуцуагъ. Ащ щыщэу 5-р гъогурыкIоныр гъэIорышIэгъэнымкIэ автомат системэу «Спектр» зыфиIорэм пышIагъ. Ахэм яшIуагъэкIэ гъогурыкIоным изытет чыжьэкIэ лъыплъэнхэ ыкIи икъэбар къаIэкIэхьан алъэкIыщт. Аварийнэ-щынэгъо чIыпIэхэм уфэупцIэ пкъэу 800 фэдиз атырагъэуцуагъ водительхэм зыдагъэзэщт лъэныкъохэр псынкIэ къафэхъуным пае.
— Статистикэм къызэригъалъагъорэмкIэ, гъогу хъугъэ-шIагъэхэр нахьыбэрэмкIэ цIыфхэм ялажьэкIэ мэхъух. Авариехэм япроцент 95-р водительхэм ялажь. Ар къыдыхилъытэзэ, Iофтхьэбзэ гъэнэфагъэхэр компанием зэрехьэх ыкIи непэрэ шапхъэхэм адиштэрэ гъогу системэу цIыфхэм яхэукъоныгъэхэр дэзыгъэзыжьыщтыр егъэпсы. Къэбарыр къаIэкIэзыгъэхьэхэрэ тамыгъэхэм ямызакъоу, фэIо-фэшIэ зэфэшъхьафхэр зыхэтхэ зыгъэпсэфыпIэ чIыпIэхэр водительхэм апае автомобиль гъогушхохэм ахагъэуцох, — щыхагъэунэфыкIыгъ къэралыгъо компанием.
Транспорт щынэгъончъэным ылъэныкъокIэ лъэпкъ политикэу зекIо-
рэм изы Iахьэу щыт гъогум щынэгъончъагъэр щыгъэпытэгъэнымкIэ «Автодорым» зэрихьэхэрэ Iофтхьабзэхэр.
Источник: Газета Адыгэ Макъ