Адыгеим испортсмен ыкIи итренер анахь дэгъухэу 2010-рэ илъэсым къыхахыгъэхэр тыгъуасэ Правительствэр зычIэт Унэм къырагъэблэгъагъэх. АР-м и Премьер-министрэу КъумпIыл Мурат ти Президентэу ТхьакIущынэ Аслъан, Правительствэм ацIэкIэ зэхахьэм хэлажьэрэмэ афэгушIуагъ, шIухьафтынхэр афишIыгъэх.
Зэхахьэр зыщаублэным сабыйхэр пчэгум къихьэхи, ИлъэсыкIэм фэгъэхьыгъэ усэхэм къяджагъэх, орэдхэр къаIуагъэх, спортсменхэм ямедальхэм ахагъахъозэ, Адыгэ Республикэм щытхъур къыфахьынэу афаIуагъ.
2010-рэ илъэсыр спортсменхэмкIи, тренерхэмкIи лъэхъэнэ гъэшIэгъонэу зэрэщытыгъэр КъумпIыл Мурат зэIукIэм щыхигъэунэфыкIыгъ. Спорт Iофтхьэбзэ 300-м ехъу АР-м щызэхащагъ. Кушъхьэфэчъэ спортымкIэ апэрэу дунэе зэIукIэгъухэу «Адыгеим и Гран-при» зыфиIорэр мэлылъфэгъу мазэм тиреспубликэ щыкIуагъ. Дунэе ралли-марафонэу «Дэнэ гъогу-2010-рэ» зыфиIорэр Адыгеим ичIыналъи щызэхащагъ.
Урысыем изэнэкъокъухэр гъогогъу 18 Адыгеим щыкIуагъэх - кушъхьэфэчъэ спортымкIэ, шахматхэмкIэ, тхэквондомкIэ, дзюдомкIэ.
Урысые ыкIи дунэе зэнэкъокъухэм АР-м испортсменхэр ахэлажьэхэзэ, хагъэунэфыкIырэ чIыпIэхэр спорт лъэпкъ 20-м ехъурэмкIэ къыдахыгъэх. Урысыем ихэшыпыкIыгъэ командэхэм спортсмен 20-м нахьыбэ ахэт.
Хэгъэгум иныбжьыкIэмэ яспартакиадэ спорт лъэпкъ 21-кIэ Адыгеир хэлэжьагъ. Темыр Кавказым иреспубликэхэмкIэ АР-м апэрэ чIыпIэр къыдихыгъ. ДзюдомкIэ, спорт щэрыонымкIэ, кушъхьэфэчъэ спортымкIэ, самбэмкIэ, нэмыкIхэмкIи медальхэр къахьыгъэх.
2010-рэ илъэсым Адыгеим ибаскетбол командэу «Динамэм» апшъэрэ купым апэрэ чIыпIэр къыщыдихыгъ. Тигандбол, футбол командэхэри УФ-м изэнэкъокъумэ ахэлэжьагъэх.
2014-рэ илъэсым Олимпиадэ джэгунхэр Шъачэ щыкIощтых. АР-р Урысыем испорт гупчэхэм ащыщ хъуным фэшI Президентэу ТхьакIущынэ Аслъан, Парламентымрэ Правительствэмрэ Iофыгъуабэмэ кIэщакIо афэхъух. Республикэ стадионыкIэ, спорткомплексхэр ашIых. Физкультурэмрэ спортымрэ апыщагъэмэ япчъагъэ хэпшIыкIэу хэхъо.
Премьер-министрэу КъумпIыл Мурат зыфэгушIогъэ спортсменхэмрэ тренерхэмрэ ащыщых Пономаренко Валерийрэ Гуляйченко Георгийрэ - спорт щэрыоныр, Абэзэ Ислъамрэ Хьэпэе Хьамидэрэ - боевой самбэр, Галстян Арсенрэ Романов Игорьрэ - дзюдор, Хъущт Ахьмэдхъанрэ Хьэшхъуанэкъо Айваррэ - самбэр, Чэсэбый Абрекрэ Хъот Юнысрэ - самбэр, Ордэн Андзауррэ Беданэкъо Рэмэзанрэ - дзюдор, Алифиренко Александррэ Алифиренко Сергейрэ - спорт щэрыоныр, Вислогуров Руслъанрэ Пчелинцев Вячеславрэ - спорт щэрыоныр, Гарбуз Мариерэ Александр Реввэрэ - гандболыр, Борсэ Астемыррэ Сихъу Казбекрэ - кикбоксингыр.
Унэхэр аратыгъэх
Гандбол командэу «Адыифыр» Адыгеим зыщызэхащагъэм къыщыублагъэу хэтых Галина Мельниковамрэ Лариса Сысоевамрэ. Спортым яIахьышIу зэрэхашIыхьагъэр республикэм ипащэхэм къыдалъыти,
Г. Мельниковамрэ Л. Сысоевамрэ унэхэр аратыгъэх. Спорт лъэпкъхэу анахьэу мэхьанэ зэратыхэрэмкIэ
гъэхъагъэ зышIырэ спортсменхэм илъэс къэс унэхэр аратызэ ашIыщт, яфэIо-фашIэхэри нахьышIоу афагъэцэкIэщтых.
Урысыемрэ Адыгеимрэ язаслуженнэ тренерэу Хъот Юныс зэхахьэм хэлэжьэгъэ спортсменхэмрэ тренерхэмрэ ацIэкIэ къэгущыIагъ. АР-м испорт базэ хэхъоныгъэшIухэр зэришIыхэрэм осэ ин ритыгъ, республикэм и Президентэу ТхьакIущынэ Аслъан, Парламентымрэ Правительствэмрэ яшIушIагъэ хигъэунэфыкIыгъ, тапэкIи тиспортсменхэм тагъэгушIо зэрашIоигъор къыIуагъ.
ЕмтIылъ Нурбый
Сурэтым итхэр: зэхахьэм хэлэжьагъэхэр.
Адыгэ Макъ