Бэдзэогъум и 24 общественнэ движениеу «Адыгэ Хэкум ипатриотхэр» зыфиIорэм ыкIи адыгэ купэу «Тызэфэд» зыфиIорэм хэтхэр Стамбул дэт УФ-м иконсульствэ зычIэт унэм ыпашъхьэ щызэрэугъоигъэх. ЗэIукIэм ушъхьагъэу фэхъугъэр бэдзэогъум и 19 къалэу Налщык общественнэ движениеу «Хасэ» зыфиIорэм ипащэу Ягъэнэ Ибрахьим къытебанахи шъобж хьылэхэр зэрэрахыгъ ары.
Зэрэугъоигъэхэр урамэу Истикал рыкIохи УФ-м иконсульствэ нэсыгъэх. Ахэмэ адыгэ быракъыхэр ыкIи лозунгхэу «Ибрахьим изакъоп» зытетхагъэхэр аIыгъыгъэх. Митингым хэлэжьагъэр резолюциеу аштагъэм къеджагъэх. Ащ зэритхагъэу, УФ-м иправительствэ адыгэхэр зыщыпсэущтыгъэ чIыгум щыхъурэм лъыплъэн фае, общественнэ движениехэм япащэхэм зэратеIункIэхэрэм ыкIи къызэратебанэхэрэм пэуцужьынэу щыт, бзэджашIэхэм пшъэдэкIыжь ягъахьыгъэн фае.
Ягъэнэ Ибрахьимэ джырэ уахътэм сымэджэщым къычIащыжьи унэм къащэжьыгъ. Ежь къызэриIорэмкIэ, къытебэнагъэхэр – шъхьэзэкъо ухъумакIо предприятиеу «Синдика» зыфиIорэм ыкIи бзэджэшIэ купхэм хэтхэр ары.