Адыгеим щыпсэурэ пстэури республикэр зэрагъэпсыгъэр илъэс 20 зэрэхъурэм зыфэгъахьазыры. Республикэм имэфэкI фэгъахьыгъэу Мыекъуапэ Iофыгъо макIэп щырекIокIырэр, ау къуджэхэм адэс цIыфхэр ахэмэ яплъынхэу амал ямыIэу бэрэ къыхэкIы. Ар къыдыхэлъытагъэу, АР-м культурэмкIэ иминистерствэ «Адыгеим искусствэхэмкIэ имастерхэр - къуаджэм щыпсэурэмэ апай» зыфиIорэ шIушIэ Iофтхьабзэр зэхищагъ. МэфэкIым ипэгъокIэу Адыгеим итворческэ купхэм республикэм щыпсэухэрэм шIухьафтын фашIыгъ: пкIэ хэмылъэу якъэгъэлъэгъонхэр рагъэкIокIых. «Налмэс», «Ислъамый», «Ошъутен», «Русская удаль», Лъэпкъ, Урыс, Камернэ музыкальнэ ыкIи нысхъэпэ театрэхэр, нэмыкIхэри хэлажьэх. Акциер Iоныгъом и1-м щегъэжьагъэу чъэпыогъум и 21-м нэс кIощ. Апэрэ къэгъэлъэгъонхэу рекIокIыгъэхэм нафэ къызэрашIыгъэмкIэ, къуаджэдэсхэм искусствэр якIас, хэшIыкI фыряI, артистхэр ашIэх, шIу алъэгъух, афэзэщых.
АфэшIагъо Фаина