Адыгэ Республикэм культурэмкIэ иапэрэ министрэу, РСФСР-м культурэмкIэ изаслуженнэ IофышIэу, АР-м искусствэхэмкIэ изаслуженнэ IофышIэшхоу Хьанэхъу Адам къыгъэшIагъэр макIэ. Ау цIыфым ищэныгъэ уасэ зэрэфашIырэр илъэс пчъагъэу дунаим зэрэтетыгъэм паеп. Ыгъэхъагъэр, изекIуакI, ицIыфыныгъ ары щыIэныгъэм уасэ лъапIэ фэзышIырэр.
Хьанэхъу Адам непи къытхэтым фэд. Мафэ къэси икъарыуи, ыпси зыхилъхьагъэ Iофым къыкIэкIуагъэр нэрылъэгъу тфэхъу. Симфоническэ оркестрыр, Камернэ музыкальнэ театрыр, оркестрэу «Русская удаль», орэдыIо купэу «Ошъутен» - ахэр зэкIэ Хьанэхъу Адам игукъэкIкIэ зэхэщагъэ хъугъэх. Непэ къызынэсыгъэми а творческэ коллективхэм Iоф ашIэ, АР-м и культурэ ибайныгъэ хагъахъо, ти республикэ ыцIэ агъэлъапIэ.
Мыкъодыжьын лъэужэу Адыгеим итарихъ къыхигъэнагъэм изышыхьат хъугъэ урамэу Краснооктябрьскэм тет унэу илъэсыбэрэ Хьанэхъу Адам зыщыпсэугъэм мыжъобгъу къыщэзэрэфызэIуахыгъэр. Зэхьахэм цIыфыбэ къекIолIагъ – Адам иIахьылхэр, культурэм ыкIи искусствэм иIофышIэхэр, спортым пыщагъэхэр. АР-м иапэрэ Президентэу Джарымэ Аслъан къыIотагъ Хьанэхъу Адам республикэм игъэпсыкIэ Iахьэу къыхилъхьагъэр, исэнэхьаткIэ зэрэчаным имызакъоу цIыфыныгъэшхо хэлэу зэрэлажьэщтыгъэр. Адыгэ къэралыгъо университетым искусствэхэмкIэ иинститут идиректорэу Наталья Чепниян игущыIэ къыщыхигъэщыгъ дунэе шапхъэмэ адиштэрэ IофшIагъэхэр культурэмкIэ апэрэ министрэм къызэрэтфигъэнагъэр. Зэхахьэм къыщыгущыIагъэр бэдэд. Ахэмэ зэкIэми Хьанэхъу Адам фэгъахыгъэ гукъэкIыжьэу яIэхэр зэфэшIхьафых, ау зэфэдэ зышIэу зы гупшысэ ахэмэ ахэлъ: Адам игъонэмысэу дунаим зэрехыжьыгъэр Адыгеим икультурэкIэ чIэныгъэшхо хъугъэ.
Iоф горэм зэкIэмэ апэу уфежьэу, ащ гъэхъэгъэшIухэр щыпшIэу, IэнэтIэ ин къызыпфагъэшъуашэкIэ удихьыхыни ылъэкIыщт. Хьанэхъу Адам ыныбжь емылъытыгъэу къыдэхъугъагъэр бэ. ЛъэгапIэу зынэсыгъэхэм ицIыфыныгъэ химыгъэхъуагъэмэ хигъэкIыгъэп. Лъэпкъым зэрэфэлэжьэщтым, цIыфхэм ишIуагъэ зэраригъэкIыщтым егупшысэзэ ыгъашIэ къыгъэшIагъ. Ары Хьанэхъу Адам мыкIосэжьын нэфэу тыгухэм къызыкIинагъэр.
Фаина Афашагова
ИА НатПресс