19.05.2010 - 14:45 - Натпресс
Жъоныгъуак1эм (маим) и 21-рэу 2010-рэ илъэсым Адыгэ лъэпкъ гъэк1одыр зыщы1агъэр илъэси 146-рэ зэрэхъурэр миллиони 6 икъурэ адыгэхэм - хэкум исыхэми, хэхэсым щыпсэухэрэми - хагъэунэфык1ы.
"Мы мафэм ехьыл1агъэу ык1и Шъачэ (Сочи) Олимпиадэр зэрэщы1эщтым пэш1уек1оу адыгэхэмк1э Жъоныгъуак1эм и 21-м Урысые Федерацием ипосольствэхэм ык1и ООН-м иунэ адэжь митингэу ащызэхэтщэщтхэм шъуахэлэжьэнэу шъукъетэгъэблагъэ", - къыще1о тхыгъэу Черкесмэ якулътурэ иинститут Натпрессым ипочта къыгъахьыгъэм.
Тхыгъэм зэритымк1э, митингхэм упч1и 3 къащагъэуцущт:
1. Адыгэ лъэпкъ гъэк1одыр штэгъэныр;
2. Сочи Олимпиадэм ищызэхэщэн зэпыгъэугъэныр;
3. Адыгэ Хэкур шъхьафит ш1ыгъэныр.
Адык1э тхыгъэм къе1уатэ лъэпкъ гъэк1одэу урыс пачъыхьэм адыгэмэ ариш1ыл1агъэр, Сочи Адыгэ хэкум икъэлэ шъхьэ1эу зэрэщытыгъэр, 1864-м лъэпкъ гъэк1од зэраш1ыгъэр ык1и Адыгэ лъэпкъым ипроцент 90% нахьыбэ зэрагъэк1одыгъэр ык1и яхэку зэрэрафыгъэхэр.
Тхыгъэм къе1о 1864-ми ыуж лъэпкъ гъэк1одыр зэрэмыуцурэр, непэ нэси хэкумк1э ц1ыфхэм яфитыныгъэхэр зэраукъохэрэр. "Мары бэш1агъэп КъЩР-м Адыгэ пащэхэр (лидерхэр) щаук1ыгъэх, ет1ани Кавказым непэ къызнэсыгъэм заохэр щэк1ох", - е1о тхыгъэм.
Джащ фэдэу тхыгъэр непэ Адыгэ хэкум, Кавказым къащыхъухэрэм къатегущы1э, Къурджым (Грузием) конференциеу щырек1ок1ыгъэми игугъу къыщеш1ы.
К1эухым митингхэр зыщаш1ыщт ч1ып1эхэр, хэгъэгухэр къепчъы. Ахэр: ООН-м иунэу Нью-Йорк дэтым дэжь (США), Истамбул (Тыркуер), Берлин, Мюнхен (Германиер), Израиль, Иорданиер, Шам (Сириер), Голландиер, Англиер, нэмык1 къэралыгъохэр.