Хабзэ зэрэхъугъэу, Урыс-Кавказ заом хэкIодагъэхэм яшъыгъо-шIэжь мафэ жъоныгъуакIэм и 21-м тиреспубликэ щыхагъэунэфыкIы. Мыщ фэгъэхьыгъэ Iофтхьабзэхэр АР-м гъэсэныгъэмрэ шIэныгъэмрэкIэ ыкIи культурэмкIэ иминистерствэхэм, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет зэхащэх.
Мэлылъфэгъум къыщегъэжьагъэу Урыс-Кавказ заом щыфэхыгъэхэм яшIэжь фэгъэхьыгъэ «Iэнэ хъураехэр», зэIукIэгъухэр, зэхэсыгъохэр, къэгъэлъэгъонхэр Адыгеим гъэсэныгъэм иучреждениеу итхэм, библиотекэхэм, музейхэм ащызэхащэх. Мы заом ишъыпкъапIэ цIыфхэм, тиныбжьыкIэхэм къагурыгъэIогъэным, цIыф лъэпкъ зэфэшъхьафэу тиреспубликэ исхэм языкIыныгъэ ыкIи яныбджэгъуныгъэ гъэпытэгъэным ахэр фэлажьэх.
ЖъоныгъуакIэм и 21-м сыхьатыр 17.00-м республикэм и къэралыгъо филармоние митинг-реквием щызэхащэщт.
Мыекъопэ къэралыгъо технологическэ университетым жъоныгъуакIэм и 24-м тарихъ шIэныгъэхэмкIэ кандидатэу Хъоткъо Самир зыхэлэжьэщт зэIукIэгъу, Урыс-Кавказ заом фэгъэхьыгъэ тхылъ къэгъэлъэгъонхэр жъоныгъуакIэм и 15 - 22-м АР-м и Лъэпкъ библиотекэ ащыкIощтых, нэмыкI Iофтхьабзэхэри зэхащэщтых.
Тилъэпкъ къыкIугъэ тарихъ гъогум, заом хэкIодагъэхэм яшIэжь гъэлъэпIэгъэнхэм зэкIэри фэгъэхьыгъэщт.
Адыгэ Макъ