23.05.2010 - 20:46 - Натпресс
Израиль ис адыгэмэ жъоныгъуак1эм (маим) и 21-м шъыгъо-ш1эжь мафэр Адыгэ къуаджэу Рихьание щыхагъэунэфык1ыгъ. Ащ хэлэжьагъэх Кфар-Камэ дэсхэр, джурт къуаджэхэу Рихьание дэжь 1утхэм ащыщхэр ык1и Израиль ш1энгъэлэжьхэу Тель-Авив щыпсэухэрэр.
Мы мафэм ехъул1эу Кфар-Камэ щыщ адыгэ к1элэ 20 фэдиз шыхэм атесхэу, Адыгэ быракъхэр а1ыгъхэу жъоныгъуак1эм и 20-м Рихьание ежьагъэх. Мыхэм джурт (еврей) к1элэ заули ахэтыгъ. Купыр чэщым Галил 1уашъхьэхэм къыщыуцугъагъ, загъэпсэфыгъ, пчэдыжьым Рихьание нэсыгъэх, чылэ дэхьэгъум адыгэ к1алэхэр шыхэм атесхэу, Адыгэ быракъхэр а1ыгъхэу къащыпэгъок1ыгъэх ык1и ахэр зэгъусэхэу Рихьание игупчэ, шъыгъо-ш1эжь мафэр зыщыхагъэунэфык1ырэм, къахэхьагъэх.
Шъыгъо зэхахьэр Хъунэ Шуки зэрищагъ ык1и егъэжьэгъум адыгэу урыс-кавказ заом хэк1одагъэхэм апае Рихьание иефэнд дыуахь къаригъахьыгъ.
Ащ нэужьым Рихьаниерэ Кфар-Камэрэ якъоджэ тхьэматэхэу Самир Харунрэ Л1ыпый Несимрэ, Миром Галил районым ипащэу Амит Софер, Рихьание иеджап1э ипащэ къэгущы1агъэх.
Непэрэ мафэмрэ неущырэ мафэмрэ бгъэпсынхэм афэш1к1э лъэпкъым итарихъ пш1энэу зэрищык1агъэр зэк1эми къыхагъэщыгъ. Адыгэхэм лъэпкъ гъэк1од зао къазэрэраш1ыл1эгъагъэр, ар зэраштэн фаер, гумэк1ыгъоу ащ пылъхэр, дунае 1офэу зэрэщытыр къэгущы1агъэхэм къыхагъэунэфык1ыгъ. Мы 1офыр мамырныгъэ ш1ык1эм тетэу, лъэпкъхэм зэгуры1оныгъэ зэдыря1эу зэрэгъэпсыгъэн фаер къа1уагъ.
Нэужым адыгэхэр яхэку къызэрэрафыгъэхэм ехьыл1агъэ документальнэ фильм къагъэлъэгъуагъ.
Пчъыхьэм, сыхьатэр 20:00 ш1эныгъэ конференциеу Темыр-Къохьэп1э Кавказым ехьыл1агъэр рагъэжьагъ, ар зэрищагъ тарихъ ш1эныгъэхэмк1э докторэу Хъунэ Яхья. Мы конференцием хэлэжьагъэх профессорэу Гемер Моше, докторэу Вайцмен Ицхак, ш1эныгъэлэжьхэу Оркъыжъ Аднан, Гъыщ Рияд.