Черкесмэ Яфитыныгъэхэм Апай Зэгухьагъэ Купым иджэпсаль

Лъытэныгъэ зыфэтшIырэ тилъэпкъэгъухэр!

Тыркуер бэшIагъэу зэхъокIыныгъэшхохэр зыщекIокIырэ уахътэм ит. Социальнэ класэу хэгъэгум ис пстэуми зэхъокIыныгъэхэм яфэмэбжымэ атырихьагъ. Ежьмэ ялъэпкъ Iофыгъохэм гъунэ алъызыфыхэрэм а зэхъокIыныгъэхэр къызфагъэфедэшъу, зышIомыIофхэм аIэкIэлъ тIэкIури ашIокIоды.

2009-рэ илъэсым лъэпкъхэм яфитыныгъэхэр шъхьафитэу къаIэтышъуным ыкIи ялъэпкъхэр къаухъумэным фэгъэхьыгъэу аштагъэ «дэмократичэскэ еплъыкIэ програмым», лъэхъаным анахь мэхьанэ зиIэ хъугъэ-шIагъэу, гъэшIэгъонышхо къытщыхъоу, тынаIэ тедзагъэу тылъыплъагъ.

Непэ нэсы къэралъыгъо Iэшъхьатетхэм щымыIэу алъытэщтыгъэ лъэпкъхэм джы лъытэныгъэ зэрэфагъэшъуащэжьырэр, къэралъыгъомрэ лъэпкъхэмрэ зэдырямыIэ зэпышIэныгъэхэм ыужи зэрихьагъэхэр купкI зиIэ лъэбэкъоу тэлъытэ.

Лъэпкъ зэфэшъхьафхэм ялIыкIохэм къэралыгъо Iэшъхьатетхэр зэраIукIагъэхэм тыгуапэу такIэлъыплъагъ.
Чэзыур Черкесхэм къызэранэсыщтым тигъэгузажъоу тыпэплъагъ.

Фитыныгъэхэм ягугъу ашIы къэс « Курд, Лаз, Черкес...» аIоу къыхадзэ зэпытрэ орэдым тигъэгугъэщтыгъ.
Ау... Аузэ уахътэр лъыкIотагъ.

Джы непэ хьаулыеу тыкъызэрэгугъагъэр къыдгуреIо.

Непэ къызнэсыгъэм къэралыгъо Iэшъхьатетмэ ащыщ горэми тилъэпкъ Iофыгъохэм къарыкIуагъэм кIэупчIэнэу тадэжь къэкIуагъэхэп.

Партие лIыкIохэу тихасэхэм къеблэгъагъэхэм гущыIэ дахэхэр къытфапчъыхи загъэбзэхыжыгъэх.

Тикультурэ къэзыухъумэщт ыкIи лъызгъэкIотэщт лъэбэкъу закъо адзыгъэу тлъэгъугъэп...

Мары джы тищэIагъэ игъунэ тыкъынэсыгъ.

КIодыпIэ чIыпIэу тызэрагъэфагъэм титэу джыри бэрэ тежэщта?

Мы упчIэхэм япэгъокIхэр тызщылъыхъущтыр тэшIэ.

Тызэрагъэулэурэ ыкIи тызэрагъэплъэхъурэ политикэхэм тапэуцуным пае,
Тилъэпкъ фитыныгъэхэр такIэдэуным пае,
Тызэрэчеркэсыр ыкIи черкесэу тыкъызэрэнэжьыщтыр теубытэгъэшхо хэлъэу къызэрэтIощтым пае мары джы пчэгум тыкъехьэ!

Уэ Кафкас лъэпкъхэр!
Уэ Ткъош Адыгэхэр!

Черкесмэ ЯФитыныгъэхэм Апае Зэгохьагъэ Купыр зыфызэхэщагъэр джары. Зилъэпкъ шIу зылъэгъурэ хэти мыщ ычIыб дэтым лъэрэмыхъу. Мыщ хэлажьэхэрэм ацIэхэм атырагъэгущыIэнэу фаехэп. Ары нахь мышIэми зышIогъэшIэгъонэу зэзыгъашIэ зышIоигъомэ ашIэн фаер зы: Мыщ ычIыбы дэтыр гу зыкIоцIылъ, гухэлъышIу Черкесхэр ары.

Уэ Кафкас лъэпкъхэр!
Уэ Ткъош Черкесхэр!

Черкесмэ ЯФитыныгъэхэм Апае Зэгохьэгъэ Купыр, сыд фэдэрэ купи сыд фэдэрэ хаси сыд фэдэрэ идеалгиеми аIэмыкIэ илъэп.

Ау Черкесмэ ЯФитыныгъэхэм Апае Зэгохьэгъэ Купыр, хэсэ пстэуми, гупшысэ зэфэшъхьафхэр зиIэ пстэуми, ялIыкIохэр зыщызэхэтхэ дэмократическэ купэу щыт.

Черкесмэ ЯФитыныгъэхэм Апае Зэгохьэгъэ Купым игухэлъ; Черкесхэм ягугъу зыщамышIырэ Анкара къэлэм дэт къэралыгъо унэхэм анаIэ тырядгъэдзэныр ары.

Черкесмэ ЯФитыныгъэхэм Апае Зэгохьэгъэ Купым ипшъэрылъ; дэмократическэ зэхахьэхэр зэхэщэгъэныр ары.

Черкесмэ ЯФитыныгъэхэм Апае Зэгохьэгъэ Купыр зиуж иты дэдэр; Черкесмэ къэралыгъо IофкIэ яныдэлъфыбзэкIэ гъэсэныгъэ зэрагъэгъотыным ыкIи яныдэлъфыбзэкIэ мэфэ реным (Сыхьат 7/24) радю ыкIи тэлэвизюнрэ къэтынхэр къафэшIыгъэныр.

Черкесхэр!
Тилъэпкъэгъухэр!

Черкесмэ ЯФитыныгъэхэм Апае Зэгохьэгъэ Купым мы гухэлъхэм атетэу и апэрэ зэхахьэр 2011-рэ илъэсым гъэтхэпэ мазэм и 13-м Анкара щызэхещэ. Сыхьат 14:00-м ехъулIэу Сыхьие гупчъэм щедгъэжьэнышъ Кызылайм бгъумкIэ тырекIонышъ Гувэнпаркым прессым пае дгъэхьазырыгъэ джэпсалъэм тыкъеджэни джащ щытыухыщт.

Мы зэхахьэм Iофыгъо закъоу къыщытIэтыщтыр Черкесхэм янэдэлфыбзэкIэ гъэсэныгъэ амал зэрагъэгъотыным ыкIи яныдэлъфыбзэкIэ мэфэ реным (Сыхьат 7/24) радю ыкIи тэлэвизюнрэ къэтынхэр къафэшIыгъэным пае, хабзэмрэ хьукмэтымрэ (Правительсве) лъэубэкъу гъэнэфагъэхэр адзыным тычIэдэуныр ары!

Тилъэпкъэгъухэр тикъощхэр!

УсакIом зэриIуагъэу:
Тыгъосэрэ мафэхэр пчъыхьапIэ щынэгъуагъ.
Неущырэ мафэхэм танэмысынкIи мэхъу.
Ау джы, игъо дэд!
Арышъ;
ШъукъакIу; гъэтхэпэ мазэм и 13-м Анкарам и урамхэм икIи гупчъэхэм тарижъугъахь!
ШъукъакIу; тыкъэзымлъэгъухэрэм зятэжъугъэгъэлъэгъу.
ШъукъакIу; Орапсэу тыбзэ! Орапсэу тикультурэ, Орапсоу тихабзэ тэжъугъэIу!
Черкэсеу тыкъэнэжьынэу тыфай тэжъугъаIу, тыфэжъугъэбан!

ЧЭРКЭСМЭ ЯФИТЫНЫГЪЭХЭМ АПАЕ ЗЭГОХЬЭГЪЭ КУП

22.02.2011
Анкарэ, Туркуе

офисный переезд с профи грузчиками