Адыгэ Республикэр илъэс 20 зэрэхъурэм ехьылIэгъэ концертэу АР-м культурэмкIэ и Министерствэрэ республикэм и Къэралыгъо филармоние щызэхащагъэр тимузыкальнэ искусствэ итарихъ шIукIэ къыхэнэжьыщт.
Пчыхьэзэхахьэр адыгабзэкIэ зезыщэгъэ АфэшIэгъо Фаинэ тикъушъхьэ лъагэмэ ядэхагъэ, псыхъо къабзэхэр бгышъхьэхэм къызэрячъэхыхэрэр, тыгъэу къытфепсырэм тичIыгу къызэригъэшIэтырэр, тичIыгу щыпсэурэ цIыфмэ республикэм икъэралыгъо гъэпсыкIэ зэрагъэпытэрэр усэмэ ахэлъ гущыIэхэмкIэ IупкIэу къыIотагъ.
Адыгэ къашъохэр дахэу къэзышIыгъэхэ артистхэу Шъэожъ Альбинэ, Хьабэхъу Заремэ, Къэбыхьэ Анзор, КIубэ Адамэ пчыхьэзэхахьэм ипчэгу къагъэбаигъ. Лъэпкъ шъуашэхэр зэпэжъыужьхэу зэращыгъым дакIоу, артистхэм къаIорэ орэдхэм адырагъаштэзэ концертым къыщышъуагъэх, чанэу хэлэжьагъэх.
Адыгэ къэралыгъо университетым иансамблэу «Жъыум» пчыхьэзэхахьэр къызэIуихыгъ. Ижъырэ орэдыр Абыдэ Артур къыхидзагъ, артистхэр къыдежъыугъэх. КIэлэцIыкIу ансамблэу «Ащэмэзыми» бэрэ Iэгу фытеуагъэх. Купхэм япащэхэу ГъукIэ Замудинрэ Бастэ Асыетрэ рагъэжьэгъэ Iофыр лъагъэкIотэнэу тащэгугъы.
Купэу «Ошъутенэм» ихудожественнэ пащэу ХьакIэко Алый, артистхэу Хъут Рустам, Даутэ Сусанэ, КIэрэщэ Эдуард, Жьакъщэкъулэ Маринэ, нэмыкIхэми ижъырэ адыгэ орэдхэр, джырэ уахътэ аусыгъэхэр къаIуагъэх. Жьакъщэкъулэ Маринэ изакъоуи орэдхэр къыхидзагъэх. ШIулъэгъу орэдыр къызэриIогъэ шIыкIэм къеушыхьаты артисткэм мэкъэ Iэтыгъэ дахэ зэриIэр, тиорэдыIо цIэрыIомэ ахэуцон зэрилъэкIыщтыр.
ОрэдыIо ныбжьыкIэхэу Хьаткъо Раситэ, Хъурэнэ Азэ уащытхъунэу зыкъагъэлъэгъуагъ. Еутых Вячеслав пщынэм фэгъэхьыгъэ орэдэу къыIуагъэм бэрэ уедэIугъэми, уезэщырэп. ЗэлъашIэрэ орэдыIохэу Нэхэе Тэмарэрэ Кушъэкъо Симэрэ искусствэм лъагъоу щыпхыращырэм IэкIыб хэгъэгумэ арыс тилъэпкъэгъухэри щыгъуазэх. Тыркуем, Иорданием, Къэбэртэе-Бэлъкъарым къарыкIыгъэ тилъэпкъэгъухэр концертым чIэсыгъэх. Шъхьаплъэкъомэ ащыщ кIалэм къытиIуагъ ащ фэдэ концертхэм нахьыбэрэ яплъы зэрэшIоигъор.
Пчыхьэзэхахьэр къызаухым искусствэр зикIасэхэу залым чIэсыгъэхэр къэтэджыхи, артистхэм, зэхэщакIохэм Iэгу афытеуагъэх.
Концертым еплъыгъэхэм, артистхэм къытаIуагъэм, пчыхьэзэхахьэм гупшысэу тигъэшIыгъэмэ афэгъэхьыгъэ тхыгъэхэр «Адыгэ макъэм» къыхиутыщтых.
Сурэтыр зэхахьэм къыщытырахыгъ.
ЕМТIылъ Нурбый
Адыгэ Макъ