Къэбэртэе – Бэлкъар Республикэм общественнэ движениеу «Хасэ» зыфиIорэм ипащэ къыщытебэнагъэх

Бэдзэогъум и 19 къалэу Налщык урамэу Московскэм общественнэ движениеу «Хасэ» зыфиIорэм ипащэу Ягъэнэ Ибрахьим къыщытебанахи шъобж хьылэхэр рахыгъ.

Ибрахьим иныбджэгъухэм къызэраIорэмкIэ, хъулъфыгъэр машинэр гаражым чIыгъэуцонэу унэм къызекIым, нэбгыритфым нахьыбэ хъурэ купыр къытебэнагъ. Джыдэдэм Ягъэнэ И. сымэджэщым къыщеIазэх. Анахьэу утыныр зытефагъэр Ибрахьимэ ышъхьэ ары. ГъучIым хэшIыкIыгъэ Iэмэ-псымэхэр тебэнакIохэм агъэфедагъэх.

Ягъэнэ Ибрахьимэ апэрэп къызэрэтебанэхэрэр. Джащ фэдэу, 2009 илъэсым тыгъэгъазэм и 5, шъобж хьылэхэр телъэу сымэджэщым ащэгъагъ. Нэужым, 2010 илъэсым мэлъылъфэгъум и 30, общественнэ движениеу «Хасэ» зыфиIорэм ипащэ джыри къытебэнагъэх. Пчыхьэм, сыхьатыр бгъум ыныкъокIэ кIуагъэу, Ибрахьимэ имашинэ екIолIагъ. «Хасэм» ипащэ ышъхьэ еон гухэлъ иIэу, ыкIыбыкIэ къэкIыгъэ кIэлэ ныбжьыкIэм ыIэ къыдихьыягъ. Ягъэнэм ар къылъэгъуи, шхъэр къыухъумэн ылъэкIыгъ, утыныр тхыкъупшъхьэм тефагъ. Ибрахьимэ къытебэнагъэм еожьыгъ ыкIи ыуж ихьагъ къыубытынэу, арэу кIэхьагъэп.

Ягъэнэ Ибрахьим къызэриIуагъэу, къызэрэтебэнагъэхэм пае къызэIухыгъэ уголовнэ Iофыр зэрыкIорэм лъыплъэщтэп. Мыщ фэдэ бзэджэшIагъэр зезыхьагъэхэр ары полициер зылъыхъурэр нахь зыгу къэкIыгъэхэр арэп. Ащ нэмыкIэу Ибрахьимэ къыкIигъэтхъыгъ, ежьыми шъхьафэу зэхэфын Iофыхэр зэрэримыгъэжьэщтыр ыкIи хэбзэнчъэу зэрэземыкIощтыр.

Аужырэ лъэхъаным Ягъэнэ И. къэбэртэе, бэлкъар ыкIи къэзэкъ общественнэ организациехэм япащэхэр зыхэлажьэщтыхэ конференциехэр зэхэщэным ыуж итыгъ.