УФ-м имэз хъызмэт и ГъэIорышIапIэу АР-м щыIэм игумэкIыгъохэм, щыкIагъэу иIэхэм Адыгеим и ЛIышъхьэ зыхэлэжьэгъэ зэIукIэм щытегущыIагъэх. Гъэзетэу «Адыгэ макъ» зыфиIорэм къызэритырэмкIэ, зэхэсыгъом хэлэжьагъэх мэз хъызмэтым пылъхэм яобществэ итхьаматэу Хьатикъое Мэджыдэ, мэз хъызмэтым иветеранхэм я Совет ипащэу АфэшIыжь Къэралбый, МКъТУ-м ипрофессорэу Юрий Сухоруких.
Мэз хъызмэтым щылажьэхэрэм фэгъэкIотэныгъэу яIагъэхэр нахь макIэ зэрэхъугъэр, отраслым гумэкIыгъэу иIэхэр мэз хъызмэтым и Кодекс иаужырэ зэхъокIыныгъэхэм къызэрахэкIыгъэр зэхэсыгъом къыщыгущыIагъэ Хьатикъое Мэджыдэ къыкIигъэтхъыгъ. ХэкIыпIэу ылъэгъухэрэм зэхэсыгъом хэлэжьагъэхэр щигъэгъозагъэх.
АР-м и ЛIышъхьэу ТхьакIущынэ Аслъан къызэриIуагъэмкIэ, сыд фэдэрэ хэкIыпIэри УФ-м изаконодательствэ диштэн фае. Республикэр мэз хъызмэтым дэIэпыIэнэу хьазыр. Аущтэу щытми, анахь Iофыгъо шъхьаIэхэр федеральнэ гупчэр къыхэмылажьэу зэшIохыгъэ хъущтэп. Мэз хъызмэтым и ГъэIорышIапIэ ипшъэрылъ шъхьаIэхэу мэз иупкIыныр хабзэм дештэмэ иуплъэкIун, чъыгыкIэхэм ягъэтысын, кадрэхэм ягъэхьазырын анаIэ тырагъэтынэу ТхьакIущынэ Аслъан къафигъэпытагъ. Джащ фэдэу ЛIышъхьэм хигъэунэфыкIыгъ АР-м и Правительствэ мэз хъызмэтым IэпыIэгъу тапэкIи зэрэфэхъущтыр.
Таисия Афашагова
ИА НатПресс