Юнус Нихад
Блэкlыгъэ тхьэмафэм, тыгъэгъазэм и 4-м США -м ит къалэу Нью-Джерси дэт Адыгэ Шlушlэ Хасэм илъэситlу къэс ышlырэ зэфэхьысыжь зэфэс иlагъ. Ащ хасэм мы аужьырэ илъэситlум ыгъэцэкlагъэхэм щатегущыlагъэх, финанс lофыгъохэм яхьылlагъэу хэсэм итхьэматэу Маруан Шолах ыкlи уплъэкlун комитетым мылъку lофхэм язытеткlэ зэфэхьысыжь къашlыгъ. Нэужьым хэдзынхэр яlагъэх. Хасэм итхьэматэу хадзыгъэр Юнус Нихад, ащ иапэрэ гуадзэу Суха Курман, ятlонэрэ гуадзэу Реслан Югъар хадзыгъэх.
Уплъэкlун комитетым нэбгыри 3 хадзыгъ - Джан Бачок, Ясмин Баг ыкlи Хасан Абдулах.
Хэсашъхьэм нэбгырэ 12 хэтынэу хадзыгъ. Ахэм ахахьэ Нью-Джерси дэс адыгэхэм ямэщыты иефэнд. Хасэм исайт къызэриlорэмкlэ, ар хэдзынхэм ахэлажьэрэп, ежь хасэм иустав зэритэу, хэсашъхьэм чlыпlэ гъэнафагъэ щыриl.
Къэlогъэн фае, США-м ис адыгэ нэбгырэ мин 15-м хэсэу яlэхэм Нью-Джерси дэт Адыгэ Шlушlэ Хасэр зэрэанахь инэр. Ащ 1952-рэ илъэсым мэкъуогъум (июнь) и 19-м къыщегъэжьагъэу lоф ешlэ, Дунае Адыгэ Хасэм хэт, тхьэматэу иlагъэхэм ащыщэу къыхэбгъэщын плъэкlыщт зэлъашlэрэ шlэныгъэлэжьэу, тхакlоу Натхъо Къадыр.
Мы хасэм фэшъхьэфэу джыри Адыгэ хэсэ заулэ США-м ит, штатэу Калифорнием щыlэ Адыгэ Хасэр, Адыгэ Культурнэ институт зыфаlорэр ыкlи нэмыкlхэр.
Адыгэу США-м исхэмэ Адыгэ хэкум зэпхыныгъыхэр дыряlэх, илъэс къэс зэфэшъхьэф lофхэр агъэцэкlэнхэу хэкум къакlох, турист куп фэдэу къакlохэри ахэтых.